பாராளுமன்றத்தில் 23 மணித்தியால உண்ணாவிரத போராட்டம் முடிவு

by **நண்பன்** Wed 22 Apr 2015 - 8:25

பாராளுமன்றத்தில் 23 மணித்தியால உண்ணாவிரத போராட்டம் முடிவு
சபாநாயகரின் அறிவிப்பையடுத்து கைவிட்டனர்: மீண்டும் சூடான விவாதம்

முன்னாள் ஜனாதிபதி மஹிந்த ராஜபக்ஷ இலஞ்ச மோசடி விசாரணை ஆணைக்குழுவுக்கு அழைத்தமைக்கு எதிர்ப்புத் தெரிவித்து ஐ.ம.சு.மு பாராளுமன்ற உறுப்பினர்களின் உண்ணாவிரதப் போராட்டம் நேற்று காலை பாராளுமன்ற அமர்வுகள் ஆரம்பித்ததுடன் முடிவுக்கு வந்தது. நேற்றுமுன்தினம் காலை 10.30 மணிக்கு ஆரம்பமான இந்த உண்ணாவிரதப் போராட்டம் சுமார் 23 மணித்தியாலங்களின் பின்னர் நேற்றுக் காலை 9.30 மணிக்கு முடிவுக்கு வந்தது.

இதேவேளை, முன்னாள் ஜனாதிபதி மஹிந்த ராஜபக்ஷவை இலஞ்ச ஊழல் மோசடி விசாரணை ஆணைக் குழுவுக்கு அழைக்காமல் ஆணைக்குழு அதிகாரிகள் அவருடைய வீட்டுக்குச் சென்று வாக்குமூலத்தைப் பதிவு செய்வதாக நீதி அமைச்சர் தனக்கு அறிவித்திருப்பதாக சபாநாயகர் சமல் ராஜபக்ஷ பாராளுமன்றத்தில் அறிவித்தார். முன்னாள் ஜனாதிபதிக்கு இலஞ்ச மோசடி விசாரணை ஆணைக்குழு அழைப்பாணை விடுத்திருந்த விவகாரத்தால் பாராளுமன் றத்தின் சபை நடவடிக்கைகளுக்கு நேற்று இரண்டாவது நாளாகவும் குழப்பம் ஏற்பட்டது.
பாராளுமன்றம் நேற்று 9.30 மணிக்கு சபாநாயகர் சமல் ராஜபக்ஷ தலைமையில் கூடியது. முன்னாள் ஜனாதிபதியை இலஞ்ச மோசடி ஆணைக்குழுவுக்கு அழைத்தமைக்கு எதிராக ஐ.ம.சு.மு எம்பிக்கள் நேற்றுமுன்தினம் உண்ணாவிரதப் போராட்டமொன்றை ஆரம்பித்து நேற்றுமுன்தினம் இரவு முழுவதும் சபையின் நடுவில் அமர்ந்து தமது எதிர்ப்பைத்
தெரிவித்திருந்தனர். நேற்று பாராளுமன்றம் கூடியபோதும் ஐ.ம.சு.மு எம்பிக்கள் சபையின் நடுவில் அமர்ந்திருந்தனர்.
செங்கோல் கொண்டுவரப்படும்போது வழிவிட்ட அவர்கள் தொடர்ந்தும் சபை நடுவில் நின்று தமது எதிர்ப்பை வெளியிட்டனர். சபை நடவடிக்கைகளைத் தொடர்ந்தும் முன்னெடுத்துச் செல்வதற்கு வழிவகுக்கும் வகையில் பாராளுமன்ற உறுப்பினர்களை தமது ஆசனங்களில் அமருமாறு சபாநாயகர் கேட்டுக் கொண்டதுடன் இந்த விடயம் தொடர்பில் தீர்ப்பை அறிவிப்பதாகவும் கூறினார். இதற்கு அமைய ஐ.ம.சு.மு எம்பிக்கள் ஆசனங்களில் சென்று அமர்ந்தனர்.
சபாநாயகர் தீர்ப்பை அறிவித்ததைத் தொடர்ந்து ஆளும் கட்சி எதிர்க்கட்சி உறுப்பினர்கள் தமது கருத்துக்களைத் தெரிவித்திருந்தனர்.
முற்பகல் 10.30 மணிவரை ஆளும் தரப்பு உறுப்பினர்களும் எதிர்க்கட்சி உறுப் பினர்களும் மாறிமாறி கருத்துக்களைத் தெரிவித்தனர்.
நிதியமைச்சர் ரவி கருணாநாயக்க ஐ.ம.சு.மு எம்பிக்களின் போராட்டம் தொடர்பில் கருத்துத் தெரிவித்தார். போராட்டத்தில் ஈடுபட்டிருந்த எம்பிக்கள் நடந்துகொண்ட விதம் தொடர்பில் அவர் கூறிய கருத்தையடுத்து ஐ.ம.சு.மு எம்பிக்கள் சபை நடுவில் வந்து மீண்டும் ஆர்ப்பாட்டத்தில் ஈடுபட்டனர்.
அமைச்சர் ரவி கருணாநாயக்கவின் கருத்தை மீளப்பெற்றுக்கொள்ளவேண்டும் என அவர்கள் கோரிக்கைவிடுத்ததுடன், அவ்வாறு மீளப்பெறும்வரை தாம் சபைநடுவிலிருந்து விலகப்போவதில் லையென்றும் கூறினர். சபை நடவடிக் கைகளைத் தொடர்ந்தும் முன்னெடுக்க முடியாத நிலையில் 10.40 மணியளவில் சபை நடவடிக்கைகளை தற்காலிகமாக இடைநிறுத்துவதுடன், கட்சித் தலைவர்கள் கூட்டத்தை கூட்டுவதாக சபாநாயகர் அறிவித்தார்.
10.40 மணிக்கு இடைநிறுத்தப்பட்ட பாராளுமன்றம் மீண்டும் 11.45 மணிக்கு கூடியது.
முன்னாள் ஜனாதிபதி மஹிந்த ராஜபக்ஷவை இலஞ்ச மோசடி விசாரணை ஆணைக்குழுவுக்கு அழைக் காமல் ஆணைக்குழு அதிகாரிகள் அவரு டைய வீட்டுக்குச் சென்று வாக்கு மூலத்தைப் பதிவுசெய்வதற்கு நடவடிக்கை எடுப்பார்கள் என நீதியமைச்சர் கூறியிருப்பதாக சபாநாயகர் அறிவித்தார்.
முன்னதாக விமல் வீரவன்ச கருத்துரைக்கையில், இலஞ்ச ஊழல் விசாரணை ஆணைக்குழுவின் தலை வருக்குத் தெரியாமலேயே முன்னாள் ஜனாதிபதி மஹிந்த ராஜபக்ஷவுக்கு எதிராக விசாரணை நடத்த அழைப்பாணை விடுக்கப்பட்டுள்ளது.

சபை முதல்வர் லக்ஷ்மன் கிரியல்ல
முன்னாள் ஜனாதிபதி மஹிந்த ராஜபக்ஷ பாராளுமன்ற உறுப்பினர் அல்ல. அவருக்குப் பாராளுமன்றத்தின் சலுகைகளை வழங்க முடியாது.
பாராளுமன்ற சிறப்புரிமையும் அவருக்குக் கிடையாது.

நீதி அமைச்சர் விஜயதாச ராஜபக்ஷ
தேர்தல் நடைபெறுகையில் வேறு நபர்களுக்கு பணமோ கடனோ பொறுப்போ, தொழிலோ வழங்குவது இலஞ்ச ஊழல் சட்டத்தின் கீழ் தவறாகும். அதனடிப்படையிலேயே முன்னாள் ஜனாதிபதிக்கு எதிராக முறைப்பாடு செய்யப்பட்டுள்ளது.

தினகரன்