பாராளுமன்ற சுற்றுவட்டத்தில் நேற்று எதிர்ப்பு ஆர்ப்பாட்டம்

by **நண்பன்** Wed 22 Apr 2015 - 8:32

பாராளுமன்ற சுற்றுவட்டத்தில் நேற்று எதிர்ப்பு ஆர்ப்பாட்டம்

மஹிந்த ராஜபக்ஷவை இலஞ்ச ஊழல் ஒழிப்பு ஆணைக்குழுவுக்கு அழைத்தமைக்கு எதிர்ப்புத் தெரிவித்து பாராளுமன்ற சுற்றுவட்டத்தில் நேற்று காலை 9.30 அளவில் பாரிய எதிர்ப்பு ஆர்ப்பாட்டமொன்று நடத்தப் பட்டது.
தேசிய சுதந்திர முன்னணி ஏற்பாடு செய்த இந்த ஆர்ப்பாட்டத்தில் பொதுமக்கள் உட்பட பாராளுமன்ற உறுப்பினர்கள் பலர் கலந்து கொண்டனர்.
இந்த ஆர்ப்பாட்டத்தில் கலந்து கொண்டு உரையாற்றிய தேசிய சுதந்திர முன்னணியின் பிரதித் தலைவர் பியசிறி விஜேநாயக்க, அரசாங்கத்தை பதவியில் இருந்து நீக்கிய பின்னரே எமது எதிர்ப்பு ஆர்ப்பாட்டம் நிறைவுக்கு வருமென்று எச்சரிக்கை விடுத்தார்.
மஹிந்த ராஜபக்ஷவை இலஞ்ச ஊழல் ஒழிப்பு ஆணைக்குழுவுக்கு அழைத்தமைக்கு எதிராக பாராளுமன்றத்தின் முற்போக்கு அரசியல்வாதிகள் பலர் ஒன்றுபட்டுள்ளனர். எங்கள் வாக்குகளின் மூலம் பாராளுமன்றத்துக்கு சென்றவர்களை நாம் ஒருபோதும் கைவிட மாட்டோம். நாம் இன்று ஆரம்பித்துள்ள இந்த எதிர்ப்பு ஆர்ப்பாட்டம் மோசடிமிக்க, வன்முறைமிக்க நல்லாட்சியை முடிவுக்கு கொண்டுவந்த பின்னரே நிறைவு பெறும்.
இந்தப் பிரதேசம் “உயர்பாதுகாப்பு வலயம்” என்று பொலிஸார் தெரிவிக்கின்றனர். எனினும் நல்லாட்சியின் பொதுமக்கள் பாதுகாப்பு அமைச்சர் ஜோன் அமரதுங்க நாட்டில் உயர்பாதுகாப்பு வலயம் என்ற ஒன்றில்லை என்று தெரிவித்துள்ளார். நீதிமன்ற தடை உத்தரவை பெற்று பொதுமக்கள் ஆர்ப்பாட்டங்கள் செய்வதை தடுப்பதற்கு இடமளிக்க முடியாது.
இந்நாட்டில் சமாதானத்தைப் பெற்றுக் கொடுத்த தலைவரை இலஞ்ச ஊழல் ஒழிப்பு ஆணைக்குழுவின் மூலம் தண்டனை வழங்குவதை பார்த்து மெளனமாக இருக்க முடியாது.
118 பாராளுமன்ற உறுப்பினர்கள் கையெ ழுத்திட்டு ஜனாதிபதி மைத்திரிபால சிறிசேனவிடம் கடிதமொன்றை கையளித்துள்ளனர். இவ்வாறான துஷ்ட வேலைகளை உடனடியாக நிறுத்த வேண்டும். பாராளுமன்றத்தில் பெரும்பான்மை பலமும் எம்மிடமே உள்ளது. முற்போக்கு பெரும்பான்மை உறுப்பினர்களின் சக்தி என்பது தேசிய சக்தியாகும். அந்த சக்தியை பின்வாங்குவதற்கு ஒருபோதும் இடமளிக்க முடியதென்றும் பியசிறி விஜேநாயக்க தெரிவித்தார்.

தினகரன்