பொண்டாட்டி தாசன்!

by **rammalar** Sat 25 Apr 2015 - 16:02

[img]

[/img]
-

தன் வயலில் உழுது கொண்டிருந்தான் ராஜாராம். அப்போது கொக்கு ஒன்று வரப்போரமாக வந்து நின்றது. அந்தக் கொக்கைப் பிடிக்க வேண்டும் என்று முயற்சித்தான் ராஜாராம். ஆனால், அந்த கொக்கானது அவன் பிடியில் சிக்கவில்லை.
மாலை நேரம் வேலையெல்லாம் முடிந்த பின்னர் வீட்டை வந்தடைந்தான் ராஜாராம்.
–
வயலில் வேலை செய்தபோது தான் ஒரு கொக்கைப் பிடிக்க முயற்சி செய்ததாகவும், அந்தக் கொக்கானது தன் பிடியில் சிக்கவில்லை என்றும் தன் மனைவி தனலட்சுமியிடம் தெரியப்படுத்தினான்.
அதனைக் கேட்ட அவன் மனைவியோ கோபமடைந்தாள். நான் கொக்கு கறி சாப்பிட வேண்டும் என்று, நெடுநாட்களாக ஆசைப்பட்டுக் கொண்டிருக்கின்றேன். நீங்களோ அந்தக் கொக்கைப் பிடிக்காமல் வந்துவிட்டீர்களே. இதுதான் உங்கள் வீரத்திற்கு அழகா? நீங்கள் எப்படியாவது அந்தக் கொக்கைப் பிடித்து வாருங்கள். நாளை நீங்கள் வயலில் வேலை செய்யாமல் இருந்தாலும் பரவாயில்லை. அந்தக் கொக்கை மட்டும் பிடிக்காமல் வந்துவிடாதீர்கள்,” என்றாள் அவன் மனைவி.
ராஜாராம் “மனைவி சொல்லே மந்திரம்’ என்று வாழ்க்கை நடத்தி வந்தான்.
–
மறுநாள் காலையில் வயல் வேலைக்குச் சென்ற ராஜாராம் வேலை செய்ய மனமில்லாமல், கொக்கு எப்போது வருமென்று ஆவலுடன் எதிர்பார்த்துக் கொண்டிருந்தான்.
சிறிது நேரத்தில் அவன் எதிர்பார்த்தபடி கொக்கானது, வயல் வரப்பில் வந்து நின்றது.
–
கொக்கைக் கண்ட ராஜாராம் மகிழ்ச்சியடைந்தான். நாம் எதிர்பார்த்தபடி கொக்கு வந்து
விட்டது. எப்படியாவது இந்தக் கொக்கைப் பிடித்து மனைவியிடம் கொடுத்தால் அவள் மகிழ்ச்சியடைவாள் என்று நினைத்தபடியே கொக்கை பிடிக்க முயன்றான்.
–
ஆனால், கொக்கோ அவன் வயலை விட்டு பறந்து பக்கத்து வயலுக்கு சென்றது. எப்படியாவது அந்தக் கொக்கைப் பிடித்திட வேண்டுமென்று முடிவு செய்த ராஜாராம் ஆத்திரத்தோடு அதனைப் பின்தொடர்ந்தான்.
கொக்கு பக்கத்து வயலையும் தாண்டி இன்னொரு வயலுக்குப் பறந்து சென்றது.
–
பக்கத்து வயல் மட்டுமில்லாது, அதற்கு அடுத்த வயலிலும் நாற்றுக்களை எல்லாம் மிதித்தப்படி “கொக்கைப் பிடிக்க வேண்டும்’ என்ற ஒரே நோக்கத்துடன் ஓடினான் ராஜாராம்.
கொக்கை விரட்டிக்கொண்டே ஓடுகின்ற ராஜாராமை பக்கத்து வயல்காரர்கள் பார்த்தனர்.
–
“ராஜாராம் நம் வயல்களில் நடப்பட்ட நாற்றுக்களை எல்லாம் மிதித்தபடி ஓடுகின்றான். நாம் அவனை சும்மா விடக் கூடாது. எப்படியும் நாம் அவனிடம் நஷ்ட ஈடு கேட்டு வாங்கிட வேண்டியதுதான்’ என்று முடிவு செய்தனர்.
உடனே அவர்கள் வேகமாக ஓடிச்சென்று ராஜாராமை பிடித்தனர்.
–
“”ராஜாராம்! நீ கொக்கைப் பிடிக்க வேண்டும் என்பதை குறிக்கோளாகக் கொண்டு ஓடினாய். ஆனால், ஓடிய வேகத்தில் எங்கள் வயல்களில் நடப்பட்டிருந்த நாற்றுக்களை எல்லாம் மிதித்து நாசம் செய்து விட்டாயே. மரியாதையாக பாதிக்கப்பட்ட வயல்காரர்களுக்கு நஷ்ட ஈடாக பணம் கொடு. இல்லையென்றால், நாங்கள் எல்லாரும் உன்னை சும்மாவிட மாட்டோம்,” என்றனர்.
அதனைக் கேட்ட ராஜாராம் திடுக்கிட்டான்.
–
“ஐயோ, நாம் தவறு செய்துவிட்டோமே. கொக்கைப் பிடிக்க வேண்டும் என்ற அவசரத்தில் மற்ற வயல்களில் நடந்து நாற்றுக்களை எல்லாம் மிதித்து விட்டோமே,
இதற்கு நாம் தண்டமாக பணம் கொடுத்தாக வேண்டும். இல்லையென்றால், இவர்கள் நம்மை விட மாட்டார்கள். அவர்கள் கேட்டுக் கொண்ட படி நாம் நஷ்ட
ஈட்டினை கொடுத்திட வேண்டியதுதான் என நினைத்தான் ராஜாராம்.
–
“அய்யோ… மனைவிக்கு தாசனாக இருந்ததால் வந்த விளைவுதான் இது. இனிமேல் நாம இப்படி இருக்கக் கூடாது’ என முடிவெடுத்தான்.
–
—————————————–
சிறுவர் மலர்