போரை வென்றுவிட்டாலும் சமாதானம் இன்னும் மலரவில்லை

by **நண்பன்** Mon 27 Apr 2015 - 7:32

இரு தேசிய கட்சிகளும் ஒன்றிணைந்துள்ள இத்தருணத்தில் அதிகாரங்களை பகிர்ந்தளிக்க முயற்சிக்க வேண்டும்

போரை வென்றுவிட்டாலும் சமாதானம் இன்னும் மலரவில்லை

யுத்தம் வெல்லப்பட்டாலும் இன்னும் சமாதானம் மலரவில்லை. எனவே இரண்டு பிரதான கட்சிகளும் ஒன்றுபட்டுள்ள இந்த வரலாற்றுத் தருணத்திலாவது அதிகாரங்களைப் பகிர்ந்து சமாதானத்தை ஏற்படுத்த முயற்சிக்க வேண்டுமென முன்னாள் ஜனாதிபதி சந்திரிகா பண்டாரநாயக்க குமாரதுங்க தெரிவித்தார்.
பம்பலப்பிட்டி கதிரேசன் மண்டபத்தில் (25) இலங்கை தமிழரசுக் கட்சியின் கொழும்புக் கிளையின் ஏற்பாட்டில் தந்தை செல்வா நினைவு தின உரை இடம்பெற்றது. இந் நிகழ்வில் முன்னாள் ஜனாதிபதி சந்திரிக்கா அம்மையார் பிரதம பேச்சாளராக கலந்துகொண்டார். கட்சியின் தலைவர் மாவை சேனாதிராசா, கொழும்புக் கிளையின் தலைவர் தவராஜா, பாராளுமன்ற உறுப்பினர் சுமந்திரனும் சட்டத்தரணி ராஜேந்திராவும் இங்கு உரை நிகழ்த்தினார்கள்.
இவ் வைபவத்தில் உரையாற்றிய சந்திரிக்கா பண்டாரநாயக்க மேலும் உரையாற்றுகையில்:
நாம் இந்தச் சந்தர்ப்பத்தினை பயன்படுத்தி இதுவரைக்கும் எங்களால் அடைய முடியாமல் இருந்த அதிகாரப் பகிர்வை அனைவரும் ஏற்படுத்த வேண்டும். சம உரித்து, சம சந்தர்ப்பத்தை ஏற்படுத்தி இந்த ஆட்சியின் ஊடாக நாட்டை கட்டியெழுப்ப வேண்டும். இதன் மூலமாக இந்த இனப் பிரச்சினைக்கு தீர்வுகாணமுடியும்.
போரை மட்டும் நாம் வென்றாலும், சமாதானம் மற்றும் சூபீட்சம் ஏற்படுத்துவதற்கு ஒரு வழியை நாங்கள் ஏற்படுத்துதல் வேண்டும். அதற்கான களநிலவரங்கள் மலர்ந்துள்ளன. அதனை தற்போதைய காலகட்டத்தில் நாம் முயற்சிக்க வேண்டும். இப்பொழுது அவ்வாறானதொரு சூழ்நிலையை ஏற்படுத்தி வருகின்றோம். இந்த நாட்டில் பொருளாதாரம் ஓங்கி வரவேண்டும். ஏழ்மை, வறுமை, கல்வி முன்னேற்றம் அடைய வேண்டும்.
தந்தை செல்வா சிறுபான்மையினது. உரிமைகளை வென்றிட பல முயற்சிகளை செய்ததொரு தலைவர் செல்வா - பண்டாரநாயக்கா ஒப்பந்தங்களை அவர் கைச்சாத்திட்டார். தந்தை செல்வாவின் முயற்சிகளை பெளத்தர்கள் சிலர் செய்ய விடாமல் தடுத்தனர்.
1956ஆம் ஆண்டு தனிச் சிங்களம் அரச மொழியாக உருவாக்கப்பட்டது. அதனால் சிறுபான்மை மொழிகள் புறக்கணிக்கப்பட்டன. இணைப்பு மொழியான ஆங்கிலமும் அதில் இருந்து வெளியே போய்விட்டது. இதன் புறக்கணிப்பு தொடர்ந்து இரு கட்சிகளின் காலத்திலும் நடைபெற்றன. இதனால் தீர்வுகளை பெற்றுக்கொடுக்காமல் கட்சிகள் மாறி மாறி தட்டிக் கழித்தன.
நான் 1994ல் ஜனாதிபதியாக ஆட்சிக்கு வந்தபோது 23வீத பெளத்த மக்கள் தான் பேச்சுவார்த்தை மூலம் தீர்வு காணலாம் என்ற நிலையில் இருந்தனர். ஏனைய வீதத்தினர் யுத்தத்தினாலேயே தீர்வு என்ற நிலையில் இருந்தனர். ஆனால் 2 வருடத்திற்குள் “வெண்தாமரை” என்ற இயக்கம் அமைத்தேன். அதனூடாக பெளத்த மக்களிடையே பல அபிப்பிராயங்களை தெரிவித்து அம் மக்களை மாற்றியதனால் 68 வீத பெளத்த மக்கள் பேச்சுவார்த்தை மூலம் முடிவு காணமுன்வந்தனர். அரசின் தலைவர்கள் எதையாவது கொடுக்க நினைத்தால் மக்கள் மனதையும் மாற்றி அவர்கள் மனதையும் வென்றெடுக்க வேண்டும். மக்களின் அபிப்பிராயம் மனப்பாங்கு மட்டுமல்லாமல் ஒருவர் மேல் மற்றொருவருக்கு உள்ள சந் தேகத்தையும் பயங்களையும் நாம் மாற்ற வேண்டியதாகவும் இருக்கின்றது.
அரசியல் அதிகாரங்களை மற்ற மக்களும் பயன்படுத்துகின்றபோதுதான் சமாதானம் முழுமை பெறும். எனது காலத்தில் அதிகாரப் பகிர்வு திட்டத்தினை வழங்க முற்பட்டோம். அந்த நேரத்தில் விடுதலைப் புலிகள் ஒரு பக்கமாக எதிர்த்தார்கள். இன்னொரு பக்கம் எதிர்க்கட்சியினர் அதனை எதிர்தார்கள். இதனால் எனது காலத்தில் முன்னெடுக்கப்பட்ட தீர்வுத்திட்டம் நிறைவேற்றப்படாமல் போய்விட்டது எனவும் சந்திரிக்கா அம்மையார் அங்கு உரையாற்றினார்.

தினகரன்