மூடப்பட்டுக்கிடந்த பல ஆலயங்கள் மீண்டும் திறக்கப்பட்டு வழிபாடுகள்

by **நண்பன்** Mon 27 Apr 2015 - 7:34

மூடப்பட்டுக்கிடந்த பல ஆலயங்கள் மீண்டும் திறக்கப்பட்டு வழிபாடுகள்

உயர் பாதுகாப்பு வலயத்திலுள்ள ஆலயங்களையும்
திறக்க நடவடிக்கை

வட மாகாணத்தில் மூடப்பட்டுக்கிடந்த இந்து ஆலயங்கள் இன்று படிப்படியாக திறக்கப்பட்டு பூஜைகள் இடம்பெறுகின்றன. படையினர் கையேற்ற காணிகளை இன்றைய அரசு விடுவிப்பதன் பயனாகவே கைவிடப்பட்ட ஆலயங்கள் மீண்டும் திறக்கப்படுவதாக மகளிர் விவகார பிரதி அமைச்சர் திருமதி விஜயகலா மகேஸ்வரன் தெரிவித்தார்.
கொழும்பு ஜெயந்தி நகர் ஜிந்துப்பிட்டி ஸ்ரீ சிவசுப்பிரமணிய ஆலயத்தின் மகா கும்பாபிஷேக விழாவை முன்னிட்டு தெ. ஈஸ்வரன் தலைமையில் இடம்பெற்ற இறுவெட்டு வெளியீட்டு விழாவின் பிரதம அதிதியாக கலந்துக்கொண்டு உரையாற்றும் போதே பிரதியமைச்சர் மேற்கண்டவாறு தெரிவித்தார். இவ்வெளியீட்டு விழா ஆலயத்தின் சண்முக விலாஸ் கலையரங்கில் நடைபெற்றது.
தொடர்ந்து அவர் பேசுகையில்: இவ் ஆலயம் 300 வருட வரலாற்றை கொண்டது. ஆலயத்தின் சிறப்பை தெரிவிக்கும் இவ் இறு வெட்டு எதிர்கால சந்ததியினருக்கு பெரும் பயன்தரும். மூன்று தசாப்தங்களாக வட பகுதியில் இடம்பெற்ற யுத்தத்தால் பல ஆலயங்கள் இன்னும் மூடப்பட்டே உள்ளன. உயர் பாதுகாப்பு வலயங்களுக்குள் சிக்குப்பட்டுள்ள ஆலயங்கள் பலவற்றில் சிலைகள் இல்லாதுள்ளன.
இன்று நாங்கள் அரசுக்கு பெரும் அழுத்தம் தருவதால் பாதுகாப்பு படையினர் வசமிருந்த காணிகள் மக்களின் வழிபாட்டுக்கு கையளிக்கப்பட்டு வருகின்றன. வடபகுதியில் முப்பதாயிரம் பேர் யுத்தத்தால் ஊனமுற்றுள்ளனர். இவர்களுக்கு ஆலயங்களே உதவிவருகின்றன. இவ்வாறே இன்று இவ் ஆலயமும் தமிழ் கலை கலாசாரத்தை வளர்த்து வருகின்றது.
எனது கணவர் இவ் ஆலய அற நெறிப் பாடசாலையை ஆரம்பித்து வைத்தார். அற நெறி பாடசாலை சிறப்பாக செயல்படுவது எனக்கு மகிழ்வைத்தருகிறது.
வடபகுதியில் தேர்தலில் போட்டியிட இயலாத நிலையில் எனது கணவர் கொழும்பில் போட்டியிட்டார். தேர்தல் காலத்தில் இடம்பெற்ற துப்பாக்கிச் சூட்டில் இவ் ஆலய முருகனே அவரை காப்பாற்றினார் எனவும் தெரிவித்தார்.

தினகரன்