உலக சந்தையில் தொடரும் எண்ணெய் விலை வீழ்ச்சி

by **நண்பன்** Wed 30 Dec 2015 - 8:45

உலக சந்தையில் தொடரும் எண்ணெய் விலை வீழ்ச்சி காரணமாக உலகின் மிகப்பெரிய எண்ணெய் ஏற்றுமதி நாடான சவூதி அரேபியாவின் வரவு செலவுத் திட்ட துண்டுவிழும் தொகை 98 பில்லியன் டொலர்களாக உயர்ந்துள்ளது.
மன்னர் சல்மானின் கீழ் முன்வைக்கப்பட்டிருக்கும் முதலாவது வரவு செலவு திட்டத்தில் நாட்டின் மொத்த வருமானம் 608 பில்லியன் ரியால்களாகும். அது எதிர்பார்க்கப்பட்டதை விடவும் 15 வீதம் குறைவாகும். ஆண்டின் செலவுகள் 975 பில்லியன் ரியால்களாகும். அது கணிக்கப்பட்டதை விடவும் 13 வீதம் அதிகம்.
இந்த பற்றாக்குறை காரணமாக எரிசக்திக்கு வழங்கப்பட்டு வந்த மானியங்கள் குறைக்கப்படும் என்று சவூதி நிதி அமைச்சு திங்களன்று அறிவித்தது.
இதனால் சவூதி அரேபியாவில் பெட்ரோலின் விலை 50 வீதம் வரை உயரும் என்று எதிர்பார்க்கப்படுகிறது. எனினும் சர்வதேச நிலையில் இருந்து நாட்டில் குறைவான விலையிலேயே எண்ணெய் பேணப்படும் என்று அரசு உறுதி அளித்துள்ளது.
இதன்படி டீசல், மின்சாரம் மற்றும் தண்ணீர் விலையும் உயரவுள்ளது.
உலக சந்தையில் எண்ணெய் விலை குறைந்துள்ள தருணத்திலும், பொருளாதார மற்றும் பிராந்திய, சர்வதேச சவால்களுக்கு மத்தியிலுமே இந்த வரவு செலவு திட்டம் முன்வைக்கப்படுவதாக மன்னர் சல்மான் குறிப்பிட்டார். சர்வதேச பொருளாதார வளர்ச்சி வீழ்ச்சி கண்டிருப்பதாகவும் அண்டை நாடுகளில் போதிய ஸ்திரத்தன்மை இல்லை என்றும் மன்னர் மேலும் குறிப்பிட்டார்.
எவ்வாறாயினும் சவூதி அரேபியாவிடம் 700 பில்லியன் டொலருக்கும் அதிகமான வெளிநாட்டு நாணய இருப்பு காணப்படுகிறது. எனவே வரவு செலவுத் திட்ட நிதி இடைவெளியை பூர்த்தி செய்ய முடியுமாக உள்ளது.
கடந்த 2012 மார்ச் மாதத்தில் பீப்பாய் ஒன்று 125 டொலர்களில் இருந்த எண்ணெய் விலை தற்போது வெறுமனே 37.18 டொலர்களாக வீழ்ச்சி கண்டுள்ளது.
2015 ஆம் ஆண்டு சவூதியின் மொத்த வருவாயில் எண்ணெய் 77 வீதத்தை பூர்த்தி செய்துள்ளது. கடந்த ஆண்டுடன் ஒப்பிடுகையில் அது 23 வீத வீழ்ச்சியாகும்.
எவ்வாறாயினும் சவூதி தனது எண்ணெய் உற்பத்தியை தொடர்ந்து அதே அளவில் பேணி வருகிறது. இதில் எண்ணெய் விலை குறைவதற்கு காரணமாக கருதப்படும் அமெரிக்க எண்ணெய் உற்பத்தியை விடவும் தம்மால் நீண்ட காலம் நிலைத்திருக்க முடியும் என்று சவூதி கருதுகிறது.
2015 ஆம் ஆண்டு சவூதியின் இராணுவ மற்றும் பாதுகாப்பு செலவுகள் 20 பில்லியன் டொலர்களாக அதிகரித்ததாக குறிப்பிட்டுள்ளது. சவூதி அண்டை நாடான யெமனில் இராணுவ தலையீட்டில் ஈடுபட்டது மற்றும் இஸ்லாமிய தேசம் குழுவுக்கு எதிரான இராணுவ நடவடிக்கைகள் காரணமாக இவ்வாறு பாதுகாப்பு செலவுகள் அதிகரித்துள்ளன.
சிவில் மற்றும் இராணுவ பணியாளர்களுக்கு சம்பளம் அதிகரிப்பதற்காகவே சவூதி அதிக தொகையை செலவிட்டுள்ளது.

தினகரன்