சாலையில் கவிழ்ந்த வேன் :பணக்கட்டுகளால் பரபரப்பு!

by **rammalar** Wed 27 Apr 2016 - 12:45

திருச்சி;திருச்சி மாவட்டம், முசிறியில் இருந்து, அரியலுாரில் உள்ள வங்கிக்கு பணம் எடுத்துச் சென்ற வேன் கவிழ்ந்து விபத்துக்குள்ளானது. திருச்சி மாவட்டம், முசிறியில் உள்ள, 'ஸ்டேட் பாங்க் ஆப் இந்தியா' வங்கியில் இருந்து, நேற்று மாலை, 30 கோடி ரூபாயுடன் வேன் ஒன்று புறப்பட்டது.அரியலுாரில் உள்ள வங்கி கிளைக்கு செல்லவிருந்த அந்த வேன், மாலை, 6:00 மணிக்கு, முசிறி -- திருச்சி சாலையில் அய்யம்பாளையம் அருகே பைக் மீது மோதி, கவிழ்ந்து விபத்துக்குள்ளானது.

வேனுக்குள் இருந்த பெட்டிகளில் பணம் இருப்பதை பார்த்த பொதுமக்கள், முசிறி தேர்தல் அதிகாரிக்கு தகவல் கொடுத்தனர்.

உடனடியாக, தேர்தல் அதிகாரிகள், சம்பவ இடத்துக்கு வந்து, விசாரணை நடத்தினர். விசாரணையில், அந்த பணம், முசிறியில் உள்ள வங்கியில் இருந்து, அரியலுாரில் உள்ள வங்கிக்கு உரிய ஆவணங்களுடன் எடுத்து செல்வதும், போலீசார் பாதுகாப்புக்கு அனுப்பி வைக்கப்பட்டிருப்பதும் தெரியவந்தது.

இதையடுத்து, பணத்தை வங்கிக்கு பத்திரமாக கொண்டு செல்ல, தேர்தல் நடத்தும் அலுவலர்கள் நடவடிக்கை எடுத்தனர்.

தினமலர்