முதல்வர் அலுவலக சிறப்புப் பணி அலுவலராக சாந்தா ஷீலா நாயர் நியமனம்

by **rammalar** Thu 9 Jun 2016 - 10:39

-

சாந்தஷீலா நாயர் சிவதாஸ் மீனா விஜயகுமார் பிரதீப் யாதவ்

முதல்வர் அலுவலகத்தின் சிறப்புப் பணி அலுவலராக ஓய்வு பெற்ற ஐ.ஏ.எஸ்., அதிகாரி சாந்தா ஷீலா நாயர் நியமிக்கப்பட்டுள்ளார்.

அவர் தமிழ்நாடு மாநில திட்ட ஆணையத்தின் துணைத் தலைவராகப் பணியாற்றி வந்தார். இப்போது, சிறப்புப் பணி அலுவலராக நியமனம் செய்யப்பட்டுள்ளார்.

1973-ஆம் ஆண்டு தமிழக பிரிவைச் சேர்ந்த மூத்த ஐ.ஏ.எஸ்.,அதிகாரி சாந்தா ஷீலா நாயர். அவர் கடந்த 2010-ஆம் ஆண்டு பணியில் இருந்து ஓய்வு பெற்றார்.

மாநில உள்துறைச் செயலாளர், சென்னை பெருநகர குடிநீர் வழங்கல் துறை நிர்வாக இயக்குநர் ஆகிய பொறுப்புகளை வகித்துள்ள சாந்தா ஷீலா நாயர், மத்திய அமைச்சகத்திலும் பல முக்கியப் பதவிகளில் பணியாற்றியுள்ளார்.

முதல்வரின் தனிச்செயலர்களாக சிவதாஸ் மீனா, விஜயகுமார்: முதல்வரின் இரண்டாவது செயலாளராக சிவதாஸ் மீனாவும், மூன்றாவது செயலாளராக எஸ்.விஜயகுமாரும் நியமிக்கப்பட்டுள்ளனர். கூட்டுறவு-உணவு-நுகர்வோர் பாதுகாப்புத் துறை முதன்மைச் செயலாளராக சிவதாஸ் மீனாவும், கால்நடை பராமரிப்புத் துறை செயலாளராக எஸ்.விஜயகுமாரும் பணியாற்றி வந்தனர்.

ஏற்கெனவே முதல்வரின் செயலகத்தில் உள்ள கே.என்.வெங்கடரமணன், முதல் செயலாளராகவும், ஏ.ராமலிங்கம் நான்காவது செயலாளராகவும் செயல்படுவர் என தமிழக அரசின் அறிவிப்பில் தெரிவிக்கப்பட்டுள்ளது. முதல்வரின் செயலாளர்களாக உள்ள ஒவ்வொருவருக்கும் நான்கு முதல் ஐந்து துறைகள் வழங்கப்படும். அவர்கள் சம்பந்தப்பட்ட துறைகளின் செயலாளர்களுடன் தொடர்பில் இருப்பர்.

உணவுத்துறைச் செயலர் பிரதீப் யாதவ்: தமிழக உணவு-கூட்டுறவுத் துறை செயலாளராக பிரதீப் யாதவ் நியமிக்கப்பட்டுள்ளார். இவர் இதற்கு முன் தமிழ்நாடு விளையாட்டு மேம்பாட்டு ஆணையத்தின் உறுப்பினர் செயலாளராக இருந்தார்.

வேளாண்மைத் துறை செயலாளராக ககன்தீப் சிங் பேடி நியமிக்கப்பட்டுள்ளார். அவர் இதற்குமுன் ஊரக வளர்ச்சி-ஊராட்சித் துறை செயலாளராக பணியாற்றி வந்தார். கால்நடை பராமரிப்பு-பால்வளம்-மீன்வளத் துறை செயலாளர் பொறுப்பையும் கூடுதலாக பேடி கவனிப்பார்.

இதேபோல ஊரக வளர்ச்சி-ஊராட்சித் துறை முதன்மைச் செயலாளராக ஹன்ஸ் ராஜ் வர்மா நியமிக்கப்பட்டுள்ளார். அவர் இதற்கு முன்னர் சுற்றுச்சூழல்-வனத் துறை முதன்மைச் செயலாளராக பணியாற்றி வந்தார்.

சுற்றுச்சூழல்-வனத் துறை முதன்மைச் செயலாளராக அதுல்ய மிஸ்ரா நியமிக்கப்பட்டுள்ளார். எனினும் இவர் ஏற்கெனவே உள்ள வருவாய் நிர்வாக ஆணையாளர் பொறுப்பையும் கூடுதலாக கவனிப்பார்.
-
தினமணி