தயிர்பானை உடைப்பில் ஈடுபட்ட ஏராளமானோர் காயம்: சிவசேனா, நவநிர்மாண் சேனா மீது பா.ஜனதா பாய்ச்சல்

by **rammalar** Sat 27 Aug 2016 - 13:40

மும்பை,

தயிர்பானை உடைப்பில் ஈடுபட்ட ஏராளமான கோவிந்தாக்கள்
காயம் அடைந்து ஆஸ்பத்திரியில் அனுமதிக்கப்பட்டனர்.
இதையொட்டி, சிவசேனா மற்றும் நவநிர்மாண் சேனா மீது
பா.ஜனதா விமர்சனம் செய்துள்ளது.

கோவிந்தாக்கள் காயம்
-
மும்பையில் கிருஷ்ண ஜெயந்தியையொட்டி நடத்தப்படும்
‘தஹி ஹண்டி’ என்கிற தயிர்பானை உடைப்பு நிகழ்ச்சிக்கு
சுப்ரீம் கோர்ட்டு விதித்த உத்தரவை மீறி, 18 வயதுக்கு உட்பட்ட
சிறுவர்கள் ஈடுபடுத்தப்பட்டனர்.

20 அடியை தாண்டியும் மனித பிரமிடு அமைக்கப்பட்டது.
சிவசேனா மற்றும் நவநிர்மாண் சேனா இதற்கு ஆதரவு அளித்தது.

இந்தநிலையில், உயரத்தில் இருந்து தவறி விழுந்தும், கூட்ட நெரிசலில்
சிக்கியும் 162 பேர் காயம் அடைந்தனர்.
இதில், கே.இ.எம். ஆஸ்பத்திரியில் அனுமதிக்கப்பட்டுள்ள
4 கோவிந்தாக்களை கல்வித்துறை மந்திரி வினோத் தாவ்டே மற்றும்
மும்பை நகர பாரதீய ஜனதா தலைவர் ஆசிஷ் ஷெலார் ஆகியோர்
நேற்று சந்தித்து உடல்நலம் விசாரித்தனர்.

தூண்டிவிட்டவர்கள் எங்கே?
-
ஆசிஷ் ஷெலார் நிருபர்களுக்கு அளித்த பேட்டியில், சிவசேனா,
நவநிர்மாண் சேனாவை விமர்சித்தார். அவர் கூறியதாவது:–

தஹி ஹண்டியில் ஈடுபட்ட 18 வயதுக்குட்பட்ட சில கோவிந்தாக்கள்
பலத்த காயம் அடைந்திருக்கின்றனர். மேலும், சுப்ரீம் கோர்ட்டு
விதிகளை மீறியதாக, குற்ற நடவடிக்கையிலும் அவர்கள்
சிக்கியிருக்கின்றனர்.

சட்டத்தை மட்டும் இன்றி, தங்கள் கை, கால்களையும் உடைத்து
கொண்ட இந்த கோவிந்தாக்களை தூண்டிவிட்டவர்களை இப்போது
எங்கே? ஒரு விவேகமுள்ள மனிதனாகவும், அரசியல் கட்சியாகவும்
தஹி ஹண்டியை பாதுகாப்பாக விளையாட இது தான் நமக்கு சரியான
தருணம்.

இவ்வாறு ஆசிஷ் ஷெலார் தெரிவித்தார்.
-
----------------------------
தினத்தந்தி