பூக்கோலம், கொண்டாட்டம் வேண்டாம்; வேலை செய்தால் போதும்: கேரள முதல்வரின் கட்டுப்பாடுகள்

by **rammalar** Sat 27 Aug 2016 - 13:41

திருவனந்தபுரம் : ஓணம் பண்டிகையை முன்னிட்டு அரசு அலுவலகங்களில் அத்தப்பூ கோலம் போடுவதையும் கொண்டாட்டங்களில் ஈடுபடுவதையும் தவிர்த்து அரசு ஊழியர்கள் தங்கள் வேலையை சரிவர செய்ய வேண்டும் என்று கேரள முதல்வர் பினராயி விஜயன் கூறியுள்ளார்.

கேரளாவின் பாரம்பரிய விழாவான ஓணம் பண்டிகை வரும் செப்டம்பர் 13ம் தேதி கொண்டாடப்பட உள்ளது.

இதனை முன்னிட்டு கேரள அரசு ஊழியர்களுக்கு அம்மாநில முதல்வர் பினராயி விஜயன் தனது பேஸ்புக்கில் விடுத்துள்ள அறிக்கையில், அரசு ஊழியர்கள் வேலை நேரத்தில் ஓணம் பண்டிகை கொண்டாடக் கூடாது. அரசு அலுவலகங்களில் மலர்க் கோலங்கள் எதுவும் வேண்டாம். போட்டிகளும் நடத்தக் கூடாது.

ஓணம் பண்டிகைக் கொண்டாட்டத்தால் அரசுப் பணிகள் பெரிதும் பாதிக்கப்படுகிறது. எனவே, வேலை நேரத்தின் போது அனைத்து அதிகாரிகளும் தங்களின் இருக்கையில் இருக்க வேண்டியது மட்டும்தான் அவசியம்.

ஓணம் மட்டுமின்றி, அனைத்து விழாக்களின் கொண்டாட்டங்களும் வேலை நேரத்தில் இல்லாமல் பார்த்துக் கொள்ள வேண்டும். இதனை அரசு ஊழியர்கள் கடுமையாக பின்பற்றுவது அவசியம் என்றும் தனது பேஸ்புக்கில் கூறியுள்ளார்.
-
தினமணி