நம்பியார் - சினிமா விமர்சனம்-

by **rammalar** Sat 27 Aug 2016 - 14:06

கதாநாயகன்–கதாநாயகி: ஸ்ரீகாந்த்–சுனைனா.

டைரக்ஷன்: கணேஷா.

கதையின் கரு:
தீய சிந்தனைக்கு ஆட்பட்டு தவறான முடிவுகள் எடுக்கும்
ஒரு இளைஞன் சந்திக்கும் பிரச்சினைகள்.

ஜெயப்பிரகாஷ் மகன் ஸ்ரீகாந்த். தந்தை விருப்பத்துக்காக
ஐ.ஏ.எஸ் தேர்வுக்கு படிக்கிறார். இவர் தனது மனதில் தோன்றும்
கெட்ட சிந்தனைகளுக்கு சந்தானம் என்ற உருவம் கொடுக்கிறார்.

அந்த உருவமே இவரை ஆட்டிப்படைத்து தவறான வழிக்கு இழுத்து
விடுகிறது. மனதை கட்டுப்படுத்த முடியாமல் படிப்பு சிதறுகிறது.
தேர்வுகளில் தோற்கிறார். இது அவரது தந்தையை எரிச்சல்
படுத்துகிறது.

கெட்ட மனசாட்சியான சந்தானத்தின் குறுக்கு யோசனைகள்படி
சுனைனாவை காதலிக்கிறார். பிறகு அவர் வேறு இளைஞனுடன்
தொடர்பு வைத்து இருப்பதாக சந்தேகித்து சண்டை போடுகிறார்.
காதல் முறிகிறது. கெட்ட மனதின் உந்துதலால் மது அருந்துகிறார்.
அந்த போதை அவரை பல்வேறு சிக்கல்களில் மாட்டி விடுகிறது.

காதலி வீட்டில் புகுந்து கற்பழிக்க முயற்சிக்கிறார். தந்தையை நடு
ரோட்டுக்கு இழுத்து பக்கத்து வீட்டுக்காரர்கள் முன்னிலையில்
அவமானப்படுத்துகிறார். போலீசாரை கண்மண் தெரியாமல்
அடிக்கிறார். மறுநாள் போதை தெளிந்ததும் நடந்த தவறுகளுக்காக
வருந்துகிறார். கெட்ட மனதை வென்று நல்லவனாக மாற
முயற்சிக்கிறார்.

அது நடந்ததா? ஐ.ஏ.எஸ் தேர்வில் வென்றாரா? காதலியுடன் சேர்ந்தாரா?
என்பது மீதி கதை.

ஸ்ரீகாந்துக்கு மைல்கல் படம். காதல், நகைச்சுவை, குடும்பபாசம்,
அனைத்திலும் அழுத்தம் பதிக்கிறார். கெட்ட உணர்வுகள்
ஆக்கிரமிப்பிலான மனபோராட்டங்களை கச்சிதமாக வெளிப்
படுத்துகிறார். சுனைனாவை எதேச்சையாக சந்தித்து மோதுவதும்,
காதல்வயப்படுவதும், பிறகு அவரை திருநங்கை என்று கருதி கழற்றி
விடுவதும் சுவாரஸ்யங்கள்.

by **rammalar** Sat 27 Aug 2016 - 14:06

குடிபோதையில் போலீஸ்காரர்களை துவம்சம் பண்ணுவது ரகளை.
கெட்ட எண்ணங்களை வென்று காதலியிடம் தான் செய்த தவறுகளை
வெளிப்படையாக சொல்லி மனதில் நிற்கிறார். குறிப்பாக தோழியை
அழைத்து வந்து படிக்கிற காலத்தில் அவளை விரும்பியதால்
அவளுடையை உண்மையான காதலனை சதி செய்து பிரித்ததாக முன்
கதையை சொல்வது ஜீவன்.

சுனைனா வசீகரிக்கிறார். தன்னை பின்தொடர்வதாக ஸ்ரீகாந்திடம்
சண்டைபோடுவது, பிறகு அவரது ஒளிவுமறைவில்லா பேச்சில்
கவரப்பட்டு காதல்வயப்படுவது. தன்மீது சந்தேகப்பட்டதும் காதலை
முறித்து விடுவது, என நிறைவாக செய்து இருக்கிறார்.

கெட்ட மனதின் உருவமாக வரும் சந்தானத்தின் நகைச்சுவை,
நய்யாண்டிகள் குலுங்க வைக்கிறது. ஜெயப்பிரகாஷ், தேவதர்ஷினி,
பஞ்சு சுப்பு, டெல்லிகணேஷ் கதாபாத்திரங்களும் நேர்த்தி.

போதையிலும் தனக்கு செய்த இம்சைகளை தந்தையிடம் தெளிவாக
பேசி அவரை ஸ்ரீகாந்த் அவமானப்படுத்தும் காட்சி கதாபாத்திரத்தை
பலவீனப்படுத்துகிறது. நேர்மறை, எதிர்மறை சிந்தனைகளின்
தாக்கத்தால் ஒரு மனிதன் வாழ்வில் நிகழும் மாற்றங்களை விறுவிறுப்பும்
கலகலப்புமாக காட்சிப்படுத்தி கவனம் ஈர்க்கிறார் இயக்குனர் கணேஷா.

விஜய் ஆண்டனி இசையில் பாடல்கள் கேட்கும் ரகம்.
எம்.எஸ்.பிரபு ஒளிப்பதிவு ரம்மியம்.
-
---------------------------------------
தினத்தந்தி

நம்பியார் - சினிமா விமர்சனம்-

நம்பியார் - சினிமா விமர்சனம்-

Re: நம்பியார் - சினிமா விமர்சனம்-