எவரெஸ்ட்டில் இந்தியர் மரணம்

by **rammalar** Wed 24 May 2017 - 5:06

புதுடெல்லி:
எவரெஸ்ட் சிகரத்தில் ஏறியபோது மாயமான இந்தியர்,
200 அடி பள்ளத்தில் விழுந்து பலியானது தெரியவந்துள்ளது.

உலகின் மிக உயரமான சிகரமாக கருதப்படும் இமயமலையில்
உள்ள எவரெஸ்ட் சிகரம் நேபாளத்தில் உள்ளது. உலகம்
முழுவதும் உள்ள மலையேற்ற வீரர்கள் இந்த சிகரத்தில்
ஏறுவதற்கு மிகுந்த ஆர்வம் காட்டி வருகின்றனர்.

ஆண்டுதோறும் மலையேறும் வீரர்களின் எண்ணிக்கை அதிகரித்து
வருகின்றது. இந்நிலையில் உத்தரப் பிரதேசத்தைச் சேர்ந்த
ரவிகுமார்(27) என்பவர் தனது வழிகாட்டி லக்பா வோங்கியா ஷேர்பா
என்பவருடன் மலையேற்றத்தை தொடங்கினார்.

கடந்த சனிக்கிழமை எவரெஸ்ட் சிகரத்தின் 8,848 மீட்டர் உயரத்தை
அவர் அடைந்தார். அதன்பின்னர் ரவிக்குமாருடனான இணைப்பு
துண்டிக்கப்பட்டுள்ளது.

இதற்கிடையே, மோசமான உடல்நிலையில் ரவிக்குமாரின்
வழிகாட்டி நான்காவது முகாமில் இருந்து மீட்கப்பட்டுள்ளார்.

இதனையடுத்து ரவிக்குமாரை தேடும் பணி நடந்தது.
36 மணி நேர தேடுதலுக்கு பின்னர், ரவிக்குமார் 200 அடி பள்ளத்தில்
விழுந்து இறந்து கிடந்தது கண்டுபிடிக்கப்பட்டுள்ளது.

ஆனால், அங்கு மோசமான சீதோஷ்ணம் நிலவுவதால், அவரது
உடலை நேற்று மீட்க முடியவில்லை. இந்த ஆண்டு மலையேற்ற
சீசனில் இதுவரை 6 பேர் உயிரிழந்துள்ளனர்.
-
-------------------------------
தினகரன்