கொஞ்சம் கொஞ்சம் -திரை விமர்சனம்

by **rammalar** Sat 7 Oct 2017 - 16:44

-
சோகத்தில் மிளிரும் நேர்த்தி!

சோகத்துக்கு மேல் சோகத்தை சுமக்கும் ஹீரோ, எப்படி சாதனை
படைக்கிறார் என்பது கதை. கேரளாவில் பழைய பேப்பர் கடை
நடத்தும் அப்புக்குட்டியிடம் வேலை செய்கிறார் கோகுல் கிருஷ்ணா.

அங்கே ஒரு இளம்பெண்ணைக் கண்டதும் காதல்கொள்கிறார்.
ஒரு போலீஸ் அதிகாரியுடன் மோதல் வருகிறது. அப்புறம் என்ன
நடக்கிறது என்பதை கொஞ்சம் கொஞ்சமாக விவரிக்கிறது
திரைக்கதை.

கோகுல் கிருஷ்ணா வெகு இயல்பாக நடித்திருக்கிறார்.
அம்மாவின் மரணத்துக்கு துடிப்பது, அக்காவின் விபத்துக்குக்
கலங்குவது என நடிப்பில் மிளிர்கிறார்.

நாயகி பிரியா மோகன் தன்னால் முடிந்தவரைக்கும் முயற்சி எடுத்து
நடித்திருக்கிறார். நாயகனின் அக்காவாக, காதுகேளாத
கதாபாத்திரத்தில் வரும் நீனு நேர்த்தியான நடிப்புத்திறனை
வெளிப்படுத்தியிருக்கிறார்.

உதவும் மனப்பான்மை மிகுந்த குணச்சித்திர கதாபாத்திரத்தில்
கச்சிதமான நடிப்பை வழங்கியிருக்கிறார் அப்புக்குட்டி.
இரண்டே காட்சிகளில் வந்தாலும் சிரிக்கவைத்து மனதில் நிற்கிறார்
மன்சூர் அலிகான்.

எஸ்.ஐ. கதாபாத்திரத்தில் வரும் ஜெயன் சேர்த்தாலா, நல்ல
மிரட்டலான தேர்வு. வல்லவனுடைய இசை படத்துக்குத் தேவையான
பங்களிப்பை செய்திருக்கிறது.

நிக்கி கண்ணம் ஒளிப்பதிவில் கேரளப் பகுதிகள்
குளிர்ச்சியூட்டுகின்றன. சோகம் நிறைந்த கதையை நேர்த்தியாக
பதிவு செய்திருக்கிறார் இயக்குநர் உதய் சங்கரன்.
–
———————–
நன்றி- வண்ணத்திரை