ஐ.ஏ.எஸ்., ஐ.பி.எஸ். உள்ளிட்ட சிவில் சர்வீசஸ் பணிகளுக்கான முதன்மை தேர்வு சென்னையில் 754 பேர் எழுதினர்

by **rammalar** Sun 29 Oct 2017 - 18:55

சென்னை,

மத்திய அரசு பணியாளர் தேர்வாணையம்(யு.பி.எஸ்.சி.) ஆண்டுதோறும் ஐ.ஏ.எஸ், ஐ.பி.எஸ், ஐ.ஆர்.எஸ், ஐ.எப்.எஸ் உள்ளிட்ட 24 சிவில் சர்வீசஸ் பணிகளுக்கான தேர்வுகளை நடத்தி வருகிறது. இந்த ஆண்டுக்கான சிவில் சர்வீசஸ் பணியில் அடங்கிய 985 பதவிகளை நிரப்புவதற்கான அறிவிப்பு கடந்த பிப்ரவரி மாதம் 22–ந் தேதி வெளியிடப்பட்டது.

இதன்படி முதல் நிலை தேர்வு கடந்த ஜூன் மாதம் 18–ந் தேதி நடத்தப்பட்டது. தேர்வு முடிவு கடந்த ஜூலை 27–ந் தேதி வெளியிடப்பட்டது. நாடு முழுவதும் 6 லட்சத்திற்கும் மேற்பட்டோர் எழுதிய தேர்வில், 13,350 பேர் தேர்ச்சி பெற்றனர். இதனைத்தொடர்ந்து முதன்மை தேர்வு (மெயின் தேர்வு) நேற்று தொடங்கியது. வரும் வெள்ளிக்கிழமை வரை இந்த தேர்வு நடைபெறுகிறது.

இந்தியா முழுவதும் 24 நகரங்களில் நேற்று முதன்மை தேர்வு தொடங்கியது தமிழ்நாட்டை பொறுத்தவரை சென்னையில் மட்டும் முதன்மை தேர்வு நடைபெற்றது. சென்னையில் 754 பேர் தேர்வு எழுதினர். 9 பேர் தேர்வு எழுத வரவில்லை. காலை 9 மணிக்கு தொடங்கிய தேர்வு மதியம் 12 மணி வரை நடந்தது.

எழும்பூர் மாநில மகளிர் மேல்நிலைப்பள்ளி, அசோக்நகர் அரசு மேல்நிலைப்பள்ளி உள்பட 4 மையங்களில் இந்த தேர்வு நடந்தது. தேர்வு எழுத வந்தவர்கள் அனைவரையும் போலீசார் முழுமையாக சோதனை செய்த பிறகே தேர்வு எழுத தேர்வு மையத்திற்குள் அனுப்பினர்.

சென்னை எழும்பூர் மாநில மகளிர் பள்ளியில் தேர்வு எழுதிய மதுரையை சேர்ந்த மாற்றுத்திறனாளியான முத்து கூறியதாவது:–

எனது தந்தை ஒரு விவசாயி. என்னை மிகவும் கஷ்டப்பட்டு படிக்க வைத்தார். நான் பட்டப்படிப்பை முடித்ததும் எனது பெற்றோர் என்னை வேலைக்கு அனுப்பாமல் போட்டி தேர்வுகளுக்கு படிக்க சொன்னார்கள்.

நான் அவர்கள் விருப்பப்படியே படித்து சிவில் சர்வீசஸ் தேர்வின் முதல் நிலைத்தேர்வில் தேர்ச்சி பெற்று, தற்போது முதன்மை தேர்வுக்கு தகுதி பெற்றுள்ளேன். இன்று (நேற்று) நடந்த தேர்வை நான் தமிழில் எழுதினேன். தேர்வு எளிமையாக இருந்தது. நான் எப்படியும் அதிகாரி ஆகி என்னை போன்றவர்களுக்கு தேவையான உதவிகளை செய்வேன். இவ்வாறு அவர் கூறினார்.

விழுப்புரத்தை சேர்ந்த சித்ரா கூறுகையில், ‘தேர்வு எளிமையாக இருந்தது. நான் 3 முறை சிவில் சர்வீசஸ் தேர்வு எழுதி உள்ளேன். கடந்த முறை நேர்முகத் தேர்வில் தோல்வி அடைந்தேன். இந்த முறை எப்படியாவது அனைத்து தேர்வுகளிலும் வெற்றி பெறுவேன்’ என்று கூறினார்.

------------------------
தினத்தந்தி