புலம்பெயர் தமிழ் மக்களுக்கு திரிபுபடுத்தப்பட்ட தகவல்கள் வழங்கப்படுகிறது - மஹிந்த ஹத்துருசிங்க

by **நேசமுடன் ஹாசிம்** Thu 3 Mar 2011 - 10:51

யாழ்.குடாநாட்டில் இடம்பெறுகின்ற அனைத்துச் சம்பவங்களும் புலம்பெயர்ந்து வாழும் தமிழ் மக்களுக்கு திரிபு படுத்தப்பட்ட தகவல்களாக வழங்கப்படுவதாக தெரிவித்துள்ள யாழ்.மாவட்ட இராணுவக் கட்டளைத் தளபதி மேஜர் ஜெனரல் மஹிந்த ஹத்துருசிங்க ஊடகவியலாளர்களே இதற்கு பொறுப்பு கூற வேண்டும் எனவும் கேட்டுக்கொண்டுள்ளார்.
யாழ். மாவட்ட செயலகத்தில் இன்று வியாழக்கிழமை காலை நடைபெற்ற ஊடகவியலாளர் சந்திப்பில் உரையாற்றும் போதே அவர் இதனைக் குறிப்பிட்டார்.

தழிழ் சமுகத்தினர் ஊடகவியலாளர்களினால் பிழையாக வழிநடத்தப்படுவதாகவும் தெரிவித்த அவர், யாழ் குடாநாட்டில் யுத்தத்துக்குப் பின்னர் இயல்பு வாழ்வுக்கான சூழ்நிலை காணப்படுவதாகவும் இந்த இயல்பு சூழலை விரும்பாத சில தீய சக்திகளின் நிகழ்ச்சி நிரலுக்கு ஊடகவியலாளர்கள் செயற்படுவதாகவும் குற்றம் சுமத்தினார்.

தகவல்களை திரிவுபடுத்தி பிரிவினையை ஏற்படுத்தும் செய்திகள் வெளியிடப்படுவது மனம் வருந்தத்தக்கது எனவும், பிரிவினையை ஏற்படுத்தக்கூடிய வகையில் செய்திகளை வெளியிடுவது நிறுத்தப்பட வேண்டும் என்றும் ஊடகவியலாளர்களைக் கேட்டுக் கொண்டுள்ளார்.