வலைதள விபரீத விளையாட்டு!- கவிதை

by **rammalar** Sun 14 Oct 2018 - 19:40

எங்கே போகிறோம்
எதை நாம் தேடுகிறோம்…
இதயங்கள் விற்று
இயந்திரம் வாங்கிடவா…
உறவுகள் உதறி
தனிமையில் வருந்திடவா!
–
நேரத்தை, துாரத்தை
குறைத்திட நினைத்தும்
வலைதள மயக்கத்தில்
வாழ்வை தொலைக்கிறோம்!
–
இணையதளம் இன்று
இளைஞர்கள் சிறையா…
எப்போதும் இதிலே
மூழ்குவது முறையா…
–
சுகமாய் இருந்திட
சுமைகளை சுமக்கிறோம்
வலைதள வலையில்
வசமாய் சிக்குகிறோம்!
–
மொபைலில் அடிமையாய்
சிறைபட்டு போகிறோம்
மரண குழிக்குள்
தெரிந்தே நீந்துகிறோம்!
–
நீதி கதைகளை
போதிக்க மறந்ததால்
நீல வலைகள் இங்கு
நீளமாய் நீள்கின்றன!
–
பாச மழையை
பொழிய மறந்ததால்
மழலையின் மனங்கள்
வெறுப்பில் துடிக்கின்றன!
–
உதடுகள் பேசினால் தான்
உறவும் வளரும்
விரல்களால் தடவினால்
வேதனைகளே மிஞ்சும்!
–
பாசத்தை துறந்து
பட்டங்கள் வாங்குகிறான்
நேசத்தை இழந்து
பதவிகள் பெறுகிறான்!
–
எறும்புகள் கடித்தாலே
துடித்திடும் தாய் மனம்
இரும்புகள் கிழிப்பதை
எப்படி தாங்கிடும்!
–
ஓரடி உயரம் நாம்
தாண்டிட பயந்தவள்
மாடியில் உச்சியில்
மரண தாவலை தாங்கிடுமா…
–
பேசாத உறவுகள்
இருப்பதினால் தான்
மொபைலோடு பிள்ளைகள்
பேசிடத் துடிக்கின்றனர்!
–
கைகோர்த்து அணைக்க
பெற்றவர் மறப்பதால்
கைபேசி பிடித்து
கனவில் மிதக்கிறது!
–
அறிவியல் குற்றமா
அவசரம் குற்றமா
பெற்றவர் குற்றமா
பிள்ளைகள் குற்றமா…
–
கவனிக்க மறந்தால்
பிள்ளைகள் பாவம்…
கண்காணிக்க மறந்தால்
பிள்ளைகள் செய்யும் பாவம்!
–
—————————-
டாக்டர் வடுகம் சிவகுமார்,
சென்னை.
வாரமலர்