3 நாட்கள் தமிழக சட்டசபை கூட்டம்

by **rammalar** Tue 8 Sep 2020 - 11:07

சென்னை:
தமிழக சட்டசபை கூட்டத்தை 3 நாட்கள் நடத்துவது என
அலுவல் ஆய்வுக்குழு கூட்டத்தில் முடிவு செய்யப்பட்டது.

தமிழக சட்டசபை கூட்டம், முதன் முதலாக, சென்னை
கலைவாணர் அரங்கில், வரும், 14ம் தேதி நடக்க உள்ளது.
கூட்டத்தை எத்தனை நாட்கள் நடத்துவது என்பது குறித்து
முடிவு செய்வதற்காக, சட்டசபை அலுவல் ஆய்வு குழு
கூட்டம், இன்று சட்டசபை வளாகத்தில் கூடியது.

சபாநாயகர் தனபால், தலைமையில் நடந்த கூட்டத்தில்,
முதல்வர், துணை முதல்வர், எதிர்க்கட்சி கொறடா மற்றும்
குழு உறுப்பினர்கள் கலந்து கொண்டனர்.

இந்த கூட்டத்தில் சட்டசபை தொடரை 3 நாட்கள் (செப்.,14-16)
நடத்துவது என முடிவு செய்யப்பட்டது. சட்டசபை கூடும்
72 மணி நேரத்திற்கு முன்பு அனைத்து எம்.எல்.ஏ.,க்களுக்கும்
கொரோனா பரிசோதனை நடத்துவது எனவும் முடிவு
செய்யப்பட்டது.

சபாநாயகர் தனபால் கூறியதாவது:

14ம் தேதி, முன்னாள் ஜனாதிபதி பிரணாப் முகர்ஜி மற்றும்
எம்எல்ஏ.,க்கள் மறைவு மற்றும் கொரோனா காரணமாக
உயிரிழந்தவர்களுக்கு இரங்கல் தெரிவிக்கப்படும்.

15ம் தேதி துணை நிதி நிலை அறிக்கை தாக்கல் செய்யப்படும்.
சட்டசபையில் கேள்வி நேரம் உண்டு. சட்டசபையில் பங்கேற்கும்
எம்.எல்.ஏ.,க்கள், அதிகாரிகள், பணியாளர்கள், போலீசார்,
பத்திரிகையாளருக்கு கொரோனா பரிசோதனை செய்யப்படும்
எனக்கூறினார்.

சட்டசபை அலுவல் ஆய்வுக்குழு கூட்டத்தில் கலந்து கொண்ட
பின்னர் துரைமுருகன் கூறியதாவது:

கொரோனா பரவலை தடுக்க தவறியது மற்றும் உரிய சிகிச்சை
தராதது குறித்தும், கல்வி கொள்கை குறித்தும் சட்டசபையில்
தி.மு.க., கேள்வி எழுப்பும். கொரோனா உள்ளிட்ட பிரச்னைகளை
விவாதிக்க 3 நாட்கள் போதாது. சட்டசபையை 7 நாட்கள் நடத்த
வேண்டும் என கூறினோம்.

ஆனால், உப்புக்கு சப்பாக, ஏதோ சபையை கூட்ட வேண்டும்
என்பதற்காக 3 நாட்களுக்கு நடத்துகிறார்கள். அதில், முதல் நாள்
இரங்கல் தெரிவிப்பது, மற்ற 2 நாட்கள் துறை ரீதியிலான கோரிக்கை,
பல மசோதாக்களை நிறைவேற்ற துடிக்கிறார்கள்.

5 அல்லது 4 நாட்கள் சபையை நடத்த வேண்டும் என கேட்டோம்.
முடியாது என தெரிவித்துவிட்டார்கள்.

எதிர்க்கட்சிகளின் குரலை காதில் போட்டு கொள்ளவில்லை.
இவ்வாறு அவர் கூறினார்.

தினமலர்