2 கைகள் இல்லாததால் கால்களால் பிளஸ்-2 தேர்வு எழுதிய மாணவி

by *சம்ஸ் Wed 9 Mar 2011 - 6:37

விழுப்புரம் மாவட்டம் திருக்கோவிலூர் அருகே உள்ள ஆற்காடு கிராமத்தை சேர்ந்தவர் அண்ணாமலை. இவரது மூத்த மகள் வித்யாஸ்ரீ (வயது 17) இவர் திருக்கோவிலூர் டேனிஸ் மிஷன் பெண்கள் மேல்நிலைப்பள்ளியில் பிளஸ்-2 வகுப்பு படித்து வந்தார். இவர் 2 கைகளும் இல்லாதவர். ஆனாலும் மனம் சோர்வடையாமல் சிறப்பாக படித்தார்.

நேற்று அவர் டேனிஷ் மிஷன் மேல் நிலைப்பள்ளியில் பிளஸ்-2 தேர்வு எழுதினார். கைகள் இல்லாததால் அவர் கால் விரல்களில் இடையில் பேனாவை வைத்து தரையில் அமர்ந்து தேர்வு எழுதினார். அரசு அவருக்கு ஒருமணி நேரம் கூடுதலாக நேரம் ஒதுக்கியது. ஆனாலும் அவர் 3 மணி நேரத்திற்குள் தேர்வை எழுதி முடித்தார். அனைவரும் அவரை ஆச்சரியமாக பார்த்தனர்.

இதுகுறித்து மாணவி வித்யாஸ்ரீ கூறியதாவது:-

நான் பிறவியிலேயே 2 கைகள் இழந்தாலும் படிப்பில் ஆர்வம் கொண்டதால் கால்களால் எழுத பயிற்சி பெற்றேன். கடந்த 10-ம் வகுப்பு பொது தேர்வை கால்களால் எழுதி 329 மதிப்பெண்கள் பெற்றேன். தற்போது 12-ம் வகுப்பில் வரலாறு பிரிவை தேர்வு செய்து படித்து வந்தேன். 1200க்கும் 1100 மதிப்பெண் குறையாமல் எடுப்பேன். தேர்வில் வெற்றிப் பெற்று வருங்காலத்தில் உயர் கல்வி படித்து ஐ.ஏ.எஸ். அதிகாரியாவதே என் லட்சியம். நான் உயர் கல்வி படிக்க அரசு உதவி செய்ய வேண்டும்.

இவ்வாறு அவர் கூறினார்.

கைகள் இல்லை என்றால் என்ன? எழுதுவதற்கு கால்கள் இருக்கின்றன. படித்து மற்றவர்கள் போல் என்னாலும் வாழ முடியும் என்று நிரூபிக்கும் வகையில் மாணவி வித்யாஸ்ரீ செயல்பட்டு வருகிறார்.