விக்கிலீக்ஸின் பாணியில் ஆரம்பிக்கப்பட்ட கியூபெக்லீக்ஸ்

by *சம்ஸ் Fri 11 Mar 2011 - 12:57

அமெரிக்க அரசின் இரகசியத் தகவல்களை இடைவிடாது வெளியிட்ட விக்கிலீக்ஸின் பாணியில், கனடாவின் கியூபெக் பிராந்திய விடயங்களை அம்பலப்படுத்தும் நோக்கில் கியூபெக்லீக்ஸ் என்ற தளம் ஆரம்பிக்கப்பட்டிருக்கிறது.
பாட்டி கியுபெகொய்ஸ் என்ற அரசியல் கட்சியிலிருந்து அதிருப்பதியடைந்த நிலையில் வெளியேறிய ஒருவரே கியூபெக்லீக்ஸ் என்ற இந்த இணையத்தளத்தினை உருவாக்கியிருக்கிறார்.

கியூபெக்லீக்ஸ் என்ற இந்த இணையத்தின் வளர்ச்சிக்காக எண்ணற்றவர்கள் திரைமறைவில் பாடுபடுகின்ற போதும் இந்த இணையத்தினைப் பிரதிநிதித்துவப்படுத்துபவராக தானே இருப்பேன் என லக் லெவெபிவ்றெ என்ற இந்த முன்னாள் அரசியல்வாதி புதனன்று அறிவித்தார்.

விக்கிலீக்ஸ் இணையத்தின் அபாரமான செயற்பாடு தனது மனதைத் தொட்டிருந்ததாகவும், கியூபெக் பிராந்திய விடயங்களை அம்பலப்படுத்தும் எண்ணம் அப்போது தான் தனக்கு ஏற்பட்டதாகவும் இவர் கூறுகிறார்.

இந்த இணையத்திற்குப் பங்களிப்புச் செய்ய விரும்புபவர்களிடமிருந்து தான் பொருத்தமான அறிக்கைகள் மற்றும் ஆவணங்களை எதிர்பார்த்திருப்பதாகக் கூறுகிறார். அரசியல் முறைகேடுகள், ஊழல்கள் மற்றும் அதிகாரத் துஸ்பிரயோகங்கள் என எண்ணற்ற பிரச்சினைகள் கியூபெக் பிராந்தியத்தில் இடம் பெறுவதாக செய்திகள் அதிகம் வெளிவரும் ஒரு காலப்பகுதியில் இந்த இணையத்தளம் ஆரம்பிக்கப்பட்டிருப்பது இங்கு குறிப்பிடத்தக்கது.

குறிப்பிட்ட அரசியல் கட்சியையோ அன்றி தரப்பினையோ குறிவைத்து ஆவணங்களை அம்பலப்படுத்தும் எண்ணம் தனக்கில்லை என்றும் கியூபெக் பிராந்தியத்தின் நன்மை கருதி பொருத்தமான ஆவணங்கள் வெளியிடப்படும் என்றும் இதன் ஸ்தாபகர் லெவெபிவ்றெ கூறுகிறார்.

கியூபெக் பிராந்தியத்தின் கட்டுமான ஒப்பந்தகாரர்களுக்கும் அரசியல் வாதிகளுக்கும் இடையிலான உறவு தொடர்பான கேள்விகள் எழுந்திருக்கும் நிலையில் பொருத்தமானதொரு தருணத்தில் தான் தான் இந்த இணையத்தினை ஆரம்பித்திருப்பதாக அவர் மேலும் கூறினார்.

இந்த இணையத்தளத்தினை நிர்வகிக்கும் அமைப்புக்கான மக்களின் முகமாகத் தான் செயற்படுவேன் என்றும் விக்கி லீக்ஸ்சினது வெற்றியின் பின்னார் இன்னமும் 30 பேர் மறைமுக ஆதரவினை வழங்கி நிற்பதாகவும் அவர் தெரிவித்தார்.