தொலைந்து போனேன் - கவிதை

by **rammalar** Sat 21 Oct 2023 - 16:42

-
புழுதி புரளும் வீதிகளில்
பச்சையோ சிவப்போ கவனமின்றி
பரபரவென்று குறுக்கும் நெடுக்குமாக
வரிசையின்றி ஊறும்
வாகனங்களின் பரபரப்பில்..
-
கோயிலைச் சுற்றி நகரமைத்த
மன்னர் பெயர் மறந்துபோக,
பெருங் கோயிலும், குறு வீதிகளும்
காலத்தால் மறையாது நிற்க..
ஓயாது தினம் நிகழும்
வணிகத்தின் சுறுசுறுப்பில்..
-
திருவிளையாடல் பல செய்து
தெய்வங்கள் மணம் புரிந்து,
திக்விஜயம் செய்தாண்ட
மகத்தான மாநகர் இதுவென்று
வருடந்தோறும் நினைவூட்டி..
-
வெயிற் காலத்தில்
வேடங்கள் கலைத்து,
கூட்டத்தில் ஒருவராய்க் கரைந்து..
மூன்று தலைமுறையை
இணைக்கின்ற பிணைப்பாக,
ஊர்கூடிக் கொண்டாடும்
திருவிழா கலகலப்பில்..
-
'ஏ ஆத்தா மீனாட்சி
இன்னைய பொளுது நல்லபடியா போக
நீயும் எங்கப்பன் சொக்கனுந்தேன்
காப்பாத்தணும்.. சொல்லிப்புட்டேன்..'
உரிமையோடு அருள் வேண்டும்
வெள்ளந்தி மனிதர்களின்
ஆத்மார்த்த பக்தியின்
ஆழ்ந்த நம்பிக்கையில்..
-
'வாங்கண்ணே எங்கிட்டு போகணும்..
நம்ம வண்டியிலேயே போயிறலாம்ணே..
ஒங்களுக்கு தெரியாததா..
ஏதோ பாத்து குடுங்கண்ணே..'
முன்பின் தெரியாத
எவருக்கும் நாள்தோறும்
'அதிதி தேவோ பவ'
என்று உதவிக்கரம் நீட்டி
'அன்பின் வழியது உயிர்நிலை' என
வாழ்ந்து காட்டுவோரின்
நட்பான வழிகாட்டலில்..
-
'தனியொருவனுக்கு உணவில்லையெனில்
இந்த ஜகத்தினை அழித்திடுவோம்..'
பசிக்கொடுமை கண்டு
உள்ளம் கொதித்துப் பாடிய,
'மகாகவி பணியாற்றிய பெருமையுடைத்து'
பள்ளி அமைந்த பரபர நகரின்
வீதிதோறும் நடைபாதையில்..
-
சூடான உணவு செய்து
சுவையான கதைபேசலுடன் கலந்து
நாள்முழுதும் அயராமல்
பரிமாறிப் பசியாற்றும்
தூங்கா நகர்வாழ்
தாயுள்ளங்களின் பேரன்பில்..
-
பிறந்து, வளர்ந்து, நகர்ந்து
மறந்திடா என் தாய் வீடு
மதுரைக்கு நான்
வரும்போதெல்லாம்,
புதியன கழிதலும்..
பழையன புகுதலும்.. என்று
காலம் மாறினாலும்
காட்சிகள் மாறாது
உறைந்து நிலைக்க..
-
மனத்திரையில் காலம்
தானாக ரீவைண்ட் ஆகி,
வேண்டாது மறுபடியும்
இளமை வரம்பெற்று,
என்னுள்ளேயே நான்
தொலைந்து போனேன்!
---------------------
~ஸ்வாமி (தமிழ் கோரா)