(25-03-2024) : பங்குனி உத்திரம்

by **rammalar** Fri 15 Mar 2024 - 4:58

--
பங்குனி 12 (25-03-2024) : பங்குனி உத்திரம். பூரண சந்திர ஒளியுடன்
பிரகாசிக்கும் பெளர்ணமியுடனும், தமிழ் மாதக் கடைசி – 12வது
மாதமாகிய பங்குனியும், 27 நட்சத்திரங்களில் 12-வது இடத்தை
வகிக்கும் உத்திரநட்சத்திரமும் இணையும் காலத்தையே பங்குனி
உத்திரம் எனக் கொண்டாடப்படுகிறது.

மிகப் பெரும் புண்ணிய பலனைத் தரவல்லதும், சகல நலன்களையும்,
காரிய சித்தியை அருள வல்லதும், பணக் கஷ்டம், திருமணத் தடைகள்,
வாராக் கடன், ஆரோக்கியக் குறைவு போன்ற அனைத்துவிதத்
தடைகளையும் நீக்கி, அனைத்துவித அபிலாஷைகளையும்
நிறைவேற்றச் செய்து, வாழ்வில் வசந்தம் வீசச் செய்யும் புனித தினமே
பங்குனி உத்திரம்,

யோக பயிற்சி செய்வதற்கும், தான – தர்மங்களைச் செய்ய, அவை
பன்மடங்காகப் பெருகி, அபரிமிதமான பலன்களை அளிக்க
வல்லதுமான நாள் இந்தப் பங்குனி உத்திரம்.

இந்நன்னாளில் சுப காரியங்களைத் தொடங்குவது மிகவும்
உத்தமமாகும். அன்று நிகழ்ந்த தெய்வத் திருமணங்களாகிய பார்வதி
பரமேஸ்வரர், தசரத குமாரர்களாகிய ராம -சீதா கல்யாணம்,
பரதன் – மாண்டவி, லட்சுமண-ஊர்மிளை, சத்ருக்கனன் – ஸுதகீர்த்தி,
ஆண்டாள்-ரெங்கமன்னார், முருகன் – தெய்வானை, நந்தி – சுயசை,
ஆகிய தெய்வங்களின் திருமணங்களும் இந்தப் பங்குனி உத்திரத்
திருநாளில்தான் என்றால், இம்மாதத்தின் தெய்வீகச் சிறப்பிற்கு, வேறு
சான்றுகளும் வேண்டுமா?!

திருமகள், திருமார்பை அலங்கரித்ததாலே, “அகலகில்லேன் இறையும்
என்று அலர்மேல் மங்கை உறை மார்பன்” எனப் பூஜிக்கப்படும்
தினமும், வெள்ளைத் தாமரையில் வீற்றிருக்கும் கலைமகள்,
நான்முகனின் நாவில் எழுந்தருளிய தினமும் இன்றுதான்!

ஆதலால்தான், பங்குனியை “கல்யாண மாதம்” எனக் கூறுவர்
பெரியோர்.
மேலும், சபரிமலை ஐயப்பனின் அவதார தினமும் இந்தப் பங்குனி
உத்திரத்தில்தான்!
-
நன்றி- தினகரன்