மரம் நட்ட மாமனிதர் - கவிதை

by **rammalar** Mon 22 Jul 2024 - 12:17

---
ஜூலை 27, அப்துல் கலாம் நினைவு நாள்

கனவு காணுங்கள் என்று
தரிசாகக் கிடந்த
கரிசல் காடுகளிலும்
கனவுகளை விளைவித்தவர்!
-
வீடுகள் தோறும்
செய்தித்தாள் வீசியபோதே
தானும் ஒருநாள்
தலைப்புச் செய்தியாக
வருவோம் என்று கனவு கண்டவர்!
-
மண் வெளியில் விளையாடும்போதும்
விண்வெளிக் கனவுகளில்
வலம் வந்தவர்!
-
கொண்ட கனவை நனவாக்க
கண்ணுறங்காமல் உழைத்தவர்
இயலாது என்று இருந்து விடாமல்
இன்னும் இன்னும் என்று
இறக்கைக் கட்டி பறந்தவர்!
-
பிறப்பு
ஒரு சம்பவமாக இருந்தாலும்
இறப்பு
ஒரு சரித்திரமாக இருக்க வேண்டும் என்றவர்!
-
சொன்னது போல இந்தியாவின்
முதல் குடிமகனாய் உயர்ந்தார்
முன்மாதிரி குடி மகனாய் வாழ்ந்தார்!
-
நேர்மையும், எளிமையும்
இவரது வாழ்க்கை வண்டிக்கு
இரு தண்டவாளங்கள்!
மாணவர் மத்தியில்
மகிழ்ச்சியோடு உரை நிகழ்த்தி
மாணவர் எழுச்சிக்கு வித்திட்டவர்!
-
சும்மா கிடந்த காகிதங்களை
சித்திரக் காகிதங்களாய் மாற்றி
சரித்திரம் படைத்தவர்!
-
இவர் சொன்ன பொன்மொழிகள்
எம்மொழியிலும் இல்லாத
விண் மணிகளாய் மின்னுகின்றன!
-
இவரது
ஏவுகணையின் வீரியம் கண்டு
விண்வெளியே வியந்து போனது!
-
கூடங்குளம் அணுமின் நிலைய
பயன்பாடு குறித்த - இவரது
கட்டுரை படித்தபோது,
அணு உலையே ஆச்சரியப்பட்டது!
-
மரம் நடச்சொல்லி
மனித இதயங்களில்
மனிதம் நட்டவர்; சிகரம் தொட்டவர்!
-
இளைஞர்களுக்கு வழிகாட்டி
வாழ்க்கையில் நம்பிக்கையூட்டி
வெளிச்சம் காட்டிய மாமனிதர்!
-
இவர் நினைவாக
இளைஞர்கள் நட்ட மரங்கள்
இப்போது நிழல் தருகின்றன!
-
அதனால் இனி -
அசோகர் மட்டுமல்லாமல்
அப்துல் கலாமும்
மரம் நட்டார் என்று சொல்லுங்கள்!
-
----------------------------
என்.ஆசைத்தம்பி, சென்னை.
நன்றி-வாரமலர்