இந்தியா சென்ற ஜனாதிபதிக்கு அரச மரியாதை கிடைக்கவில்லை - இலங்கை குற்றச்சாட்டு

இலங்கை இந்திய அணிகளுக்கு இடையிலான 10-வது உலகக் கிண்ண இறுதிப் போட்டியைக் காண இந்தியா சென்ற ஜனாதிபதி மகிந்த ராஜபக்­ச இந்திய அரசாங்கத்தால் சரிவரக் கவனிக்கப்படவில்லை என அரசு குற்றம் சுமத்தியுள்ளது.
உலகக் கிண்ண இறுதிப் போட்டியைக் காண மும்பை சென்ற ஜனாதிபதி மகிந்த ராஜபக்ச­ 30 ஆசன ஒதுக்கீட்டைக் கோரியிருந்த போதிலும் அவருக்கு 10 ஆசனங்களே வழங்கப்பட்டதாக கொழும்பு அரசியல் வட்டாரங்கள் சுட்டிக்காட்டியுள்ளன.

இந்த இறுதிப் போட்டியைக் காண்பதற்கு இலங்கைக்கு அதிக அனுமதிச் சீட்டுக்களை வழங்கியிருந்தால் தாம் மகிழ்ச்சி அடைந்திருப்போம் என இந்தியாவிற்கான இலங்கைத் தூதரக உயர் அதிகாரி ஜெனரல் உபெக்கா சமரதுங்க இந்திய ஊடகம் ஒன்றிற்குத் தெரிவித்துள்ளார்.

நியூசிலாந்து அணியுடனான அரையிறுதிப் போட்டியில் இலங்கை அணி வெற்றி பெற்றதன் பின்னர் இந்திய அணியுடனான இறுதிப் போட்டியைக் காண ஜனாதிபதி மகிந்த ராஜபக்ச­ தயாராகினார்.

எனினும் போட்டியைக் காணச் சென்ற ஜனாதிபதி மகிந்த ராஜபக்­விற்கு ஒரு நாட்டின் ஜனாதிபதி என்ற வகையில் இந்தியாவில் உரிய மரியாதைகள் அளிக்கப்படவில்லை என உபெக்கா சமரதுங்க குற்றம் சுமத்தியுள்ளார்.

இந்தியாவில் வைத்து இலங்கை கிரிக்கெட் அணியைச் சந்திப்பதற்கு ஜனாதிபதி மகிந்த ராஜபக்ச அனுமதி கோரியிருந்த போதிலும் அதற்கான அனுமதி வழங்கப்பட்டிருக்கவில்லை. அத்துடன் இறுதிப் போட்டியில் வெற்றி பெற்ற அணியுடன் இருந்து புகைப்படம் எடுக்கவும் ஜனாதிபதி மகிந்த ராஜபக்சவுக்கு சந்தர்ப்பம் வழங்கப்படவில்லை.

இந்நிலையில் பாகிஸ்தான் மற்றும் இந்திய துடுப்பாட்ட அணிகளுக்கு இடையிலான அரையிறுதிப் போட்டியைக் காண வருமாறு பாகிஸ்தான் பிரதமருக்கு இந்தியா உத்தியோக பூர்வ அழைப்பு விடுத்திருந்ததினால் அவர் முறையாகக் கவனிக்கப்பட்டதாக இந்தியா பதிலளித்துள்ளது.

எனினும் இலங்கை ஜனாதிபதி மகிந்த ராஜபக்ச அழைப்பின்றி தனிப்பட்ட ரீதியில் இந்தியாவுக்கு வந்ததன் காரணமாகவே அவரை அரச மரியாதைகளுடன் கவனிக்க முடியவில்லை என இந்திய கிரிக்கெட் வாரியத்தின் சிரேஷ்ட நிர்வாக அதிகாரி ரட்னகார் ரெட்டி தெரிவித்துள்ளார்.

இந்தியா சென்ற ஜனாதிபதி மகிந்த ராஜபக்ச உரிய முறையில் கவனிக்கப்படாமை குறித்து இந்திய அதிகாரிகளிடம் முறையிடப்பட்டுள்ளதாக இந்தியாவுக்கான தூதுவர் பிரசாத் காரியவசம் குறிப்பிட்டுள்ளார்.