உலகை அணைக்க கரங்கள் விரிப்போம்.

by **ஹம்னா** Mon 25 Apr 2011 - 21:09

ஒரு அதிகாரி இருந்தார். அவர் எப்போதுமே தன் வேலையிலேயே ஆழ்ந்த கவனமுடன் இருப்பார். தன் வேலையைத் தவிர, அவருக்கு வேறு எதிலும் நாட்டம் கிடையாது. அதைப் பற்றி மட்டுமே சிந்திப்பார். அதைப் பற்றித்தான் பேசுவார்.

ஒரு நாள் அவர் தன் பணி தொடர்பாக கப்பல் பயணம் செய்தார். கப்பலில் தனக்கு ஒதுக்கப்பட்ட அறையில் அமர்ந்து எழுதிக் கொண்டிருந்தார். கப்பல் ஒரு தீவின் அருகில் சென்றது. பயணிகள் எல்லோரும் மேல் தளத்திற்கு வந்து அந்தத் தீவைப் பார்த்தார்கள்.

தீவு மிகவும் அழகாக இருந்தது. கரையெங்கும் பற்பல வர்ணங்களில் அற்புதமான பூக்கள் மலர்ந்திருந்தன. வானுயர்ந்த எழில் மரங்கள் அடர்ந்திருந்தன அங்கே. நிறையப் பறவைகள் இருந்தன. மரம் விட்டு மரம் தாவிக் கொண்டிருந்தன குரங்குகள். அந்த மாலைப் பொழுதில், தீவின் மேலே வானவில் ஒன்றும் அதி அற்புதமாகத் தோன்றியிருந்தது. அது காண்பதற்கு அரிய அழகிய காட்சியாக இருந்தது. பயணிகள் எல்லோரும் அந்தக் காட்சிகளை மனம் ஒன்றி ரசித்து மகிழ்ந்தார்கள்.

ஆனால், அதிகாரி இருந்த இடத்தைவிட்டு எழவில்லை. தன் எழுத்து வேலையிலேயே மும்முரமாக இருந்தார். கப்பல் அப்போது ஒரு அழகிய தீவை ஒட்டிச் சென்று கொண்டிருக்கிறது என்று அவரிடம் அறிவிக்கப்பட்ட போதும், அவர் அதில் ஆர்வம் காட்டவில்லை. தான் எத்தகைய ஒரு காட்சியை இழந்திருக்கிறோம் என்று அவருக்குத் தெரியவில்லை.

உண்மையில், அவர் மிகச் சிறிய வாழ்வைத்தான் வாழ்ந்து கொண்டிருக்கிறார்.

இந்த எல்லையற்ற பிரபஞ்சத்தில் உள்ள அருமையான விஷயங்களுடன் அவருக்கு எந்தத் தொடர்பும் இல்லை. உறவும் இல்லை. அவருக்கு ஆயிரம் நண்பர்கள் இருந்தாலும், சுற்றத்தார் இருந்தாலும், இயற்கையுடன் அவருக்கு உறவு இல்லையென்றால் அது தனிமையான வாழ்க்கைதான்.

இயற்கையைப் பார்த்து அனுபவிப்பதும், அந்தச் சூழலுடன் கலந்திருப்பதும், அதைப் போற்றிக் காப்பாற்றுவதும்தான் மனித வாழ்வை முழுமையடையச் செய்கின்றன. நமக்கு சூரியோதயத்தின் அழகை உணரத் தெரியவேண்டும். இசையை, ஓவியத்தை, இலக்கியத்தை, பூக்களின் புன்னகையை அனுபவிக்கத் தெரிய வேண்டும். அப்போதுதான், நாம் விரிந்த ஒரு வாழ்க்கைக்குள் இருக்கிறோம் என்று பொருள்.

நாம் இந்த சமூகத்துடனும், இயற்கையுடனும் உறவுகொண்டு அனைத்திலும் கலந்திருக்கிறோம் என்று பொருள். ஒரு மனிதனின் துன்பம் நமக்கு வேதனையளிப்பதுபோல, ஒரு மரத்தின் அழிவும் நமக்குக் கலக்கத்தை ஏற்படுத்தினால், அந்த

மனம் பெரிய மனம். அந்த மனதில் இந்த உலகில் உள்ள அனைத்திற்கும் இடம் உண்டு.