வறுமையை நாட்டிலிருந்து முற்றாக ஒழிப்பதே இலக்கு

by **நேசமுடன் ஹாசிம்** Fri 29 Apr 2011 - 9:03

மஹிந்த சிந்தனையின் கீழ் நாட்டில் வறுமையை முழுமையாக ஒழிப்பதே அரசாங்கத்தின் இலக்கு என்று இலங்கை மத்திய வங்கியின் துணை ஆளுநர் தர்மா தீரசிங்க நேற்றுத் தெரிவித்தார்.

மஹிந்த சிந்தனை தேசிய வேலைத் திட்டத்தின் பலனாக நாட்டின் வறுமை கடந்த ஐந்தாண்டு காலப் பகுதியில் 7.8 சதவீத வீழ்ச்சியைக் கண்டிருப்பதாகவும் அவர் கூறினார்.

நாட்டில் வறுமைக் கோட்டின் கீழ் வாழ்வோர் 1990ம் ஆண்டின் நடுப் பகுதியில் 24 சதவீதமாகக் காணப்பட்டனர். இது 2006ம் ஆண்டில் 15.2 சத வீதமா கவும், 2010ம் ஆண்டு முடிவுறும் போது 7.4 சத வீதம் வரையும் வீழ்ச்சி அடைந்துள்ளது என்றும் அவர் கூறினார்.

தென்பகுதிக்கு வருகை தந்துள்ள யாழ். மாவட்ட விவசாயச் சங்கங்களின் பிரதிநிதிகளைச் சந்திக்கும் நிகழ்வில் உரையாற்றிய போதே அவர் மேற்கண்டவாறு குறிப்பிட்டார்.

இலங்கை மத்திய வங்கி கேட்போர் கூடத்தில் நடைபெற்ற இந்நிகழ்வில் அவர் தொடர்ந்தும் உரையாற்றுகையில், வறுமையை ஒழிப்பதற்கான வேலைத் திட்டங்கள் விரிவான அடிப்படையில் முன்னெடுக்கப்படுகின்றன. இதன் பயனாக கடந்த ஐந்தாண்டு காலப் பகுதியில் வறுமைக் கோட்டின் கீழ் வாழ்வோரின் எண்ணிக்கை பெரிதும் குறைந்துள்ளது என்றாலும் வறுமையை இந்நாட்டிலிருந்து முழுமையாக ஒழிப்பதே அரசாங்கத்தின் இலக்கு.

இந்த திட்டத்தின் கீழ் பல வேலைத் திட்டங்கள் நாடெங்கிலும் செயற்படுத்தப் பட்டுள்ளன. இவ்வேலைத் திட்டங்கள் வடக்கு, கிழக்கு மாகாணங்களிலுள்ள மாவட்டங்களிலும் அம் மாகாணங்களை அண்டிய மாவட்டங்களிலும் விரிவான அடிப்படையிலும் முன்னெடுக்கப்படுகின்றன என்றார்.