இளம்பெண் போட்டோ இணையதளத்தில் வெளியீடு

by **நேசமுடன் ஹாசிம்** Sun 1 May 2011 - 19:19

சென்னை : இளம்பெண்ணின் போட்டோ, செல்போன் எண்ணை குறிப்பிட்டு, தேவைப்பட்டால் தொடர்பு கொள்ளுங்கள் என்று இணையதளம் மூலம் தகவல் பரப்பிய சாப்ட்வேர் இன்ஜினியர் கைது செய்யப்பட்ட0£ர். அமைந்தகரையைச் சேர்ந்தவர் கீர்த்தனா (23) (பெயர் மாற்றப்பட்டுள்ளது). பிஎஸ்சி பட்டதாரியான இவர், அண்ணா நகரில் ஒரு சாப்ட்வேர் நிறுவனத்தில் பணிபுரிந்து வருகிறார்.

அதே நிறுவனத்தில், அண்ணா நகரைச் சேர்ந்த பாலமுருகனும் (32) பணிபுரிந்தார். இவர் இன்ஜினியரிங் படித்து முடித்தவர்.
ஒரே நிறுவனத்தில் பணிபுரிந்ததால், இருவரும் நெருங்கி பழகினர். பல்வேறு இடங்களுக்கு சென்று சுற்றித் திரிந்தனர். 3 ஆண்டுகள் ஒன்றாக பழகியதால், தன்னை திருமணம் செய்து கொள்ளுமாறு, கீர்த்தனாவிடம் பாலமுருகன் வலியுறுத்தினார்.

வீட்டில் எதிர்ப்பு தெரிவிப்பார்கள் என்று கருதிய கீர்த்தனா, திருமணத்துக்கு சம்மதம் தெரிவிக்கவில்லை. நண்பர்களாகவே தொடர கீர்த்தனா விருப்பம் தெரிவித்தார். இதனால், இருவருக்கும் இடையே கருத்து வேறுபாடு ஏற்பட்டது. நாளடைவில் அது மோதலாக வெடித்தது. பாலமுருகனுடன் பேசுவதையும், சந்திப்பதையும் கீர்த்தனா தவிர்த்தார். இதனால், வேதனை அடைந்த பாலமுருகன் வேலை மாறுதலாக வேறு நிறுவனத்துக்கு சென்று விட்டார்.

இதற்கிடையில், தன்னை ஏமாற்றிய கீர்த்தனாவை பழிவாங்க பாலமுருகன் துடித்தார். இணைய தளத்தில் ஒரு முகவரியை தானாகவே தொடங்கினார். அதில், கீர்த்தனாவின் போட்டோ, செல்போன் எண்ணை குறிப்பிட்டு “தேவைப்பட்டால் தொடர்பு கொள்ளுங்கள்’’ என்று குறிப்பிட்டார். இதை கீர்த்தனாவின் உறவினர்கள், நண்பர்கள் என பலருக்கு அனுப்பி வைத்தார். இந்த எண்ணை பலர் தொடர்பு கொண்டு பேச ஆரம்பித்தனர். இதனால், கோபம் அடைந்த கீர்த்தனா இதுகுறித்து, மத்திய குற்றப்பிரிவு போலீசில் புகார் அளித்தார்.

கூடுதல் துணை கமிஷனர் சுதாகர் வழக்குப் பதிவு செய்து விசாரணை நடத்தினார். எந்த முகவரியில் இருந்து இதுபோன்று தவறான தகவல்கள் செல்கிறது என்று சோதனை செய்தபோது, பாலமுருகன்தான் இதுபோன்ற காரியத்தில் ஈடுபட்டது தெரியவந்தது. இதுதொடர்பாக, பாலமுருகன் நேற்று கைது செய்யப்பட்டார்.