அமெரிக்கர்கள் நிச்சயம் விலை கொடுத்தாக வேண்டும்: அல்கொய்தா கடும் எச்சரிக்கை

by **sadir** Thu 12 May 2011 - 13:03

பின்லேடனை கொன்றதற்கான விலையை அமெரிக்க மக்கள் கொடுத்தாக வேண்டும் என்று அல்கொய்தா எச்சரிக்கை விடுத்துள்ளது.
இது பற்றி அல்கொய்தாவின் அதிகாரபூர்வ இணையதளத்தில் வெளியிடப்பட்ட அறிக்கையில் கூறியிருப்பது: பின்லேடனை அமெரிக்கா கொன்று மிகப்பெரிய தவறு செய்து விட்டது.

இதன் மூலம் மாபெரும் பாவத்தை சம்பாதித்து விட்டது. இதற்கான விலையை அமெரிக்க மக்கள் கொடுத்தாக வேண்டும்.

அமெரிக்க அதிபர் ஒபாமா தன்னை ராணுவம் காப்பாற்றும் என்று நினைக்கிறார். ஆனால் எங்களுடைய தாக்குதலில் இருந்து அவரை யாரும் காப்பாற்ற முடியாது.

இதற்காக முஸ்லிம்கள் திட்டமிட்டு தாக்குதல் நடத்த வேண்டும் என்று அந்த அறிக்கையில் தெரிவிக்கப்பட்டுள்ளது.

கடந்த 2009 ஜனவரியில் ஏமன் மற்றும் சவுதியில் செயல்பட்டு வந்த அல்கொய்தா பிரிவுகள், அரபுதீபகற்ப அல்கொய்தா(ஏ.கியூ.ஏ.பி) என்ற பெயரில் ஒன்றிணைந்தன.

அதன் தற்போதைய தலைவர் நசிர் அல் வாகிஷி இணையதளத்தில் வெளியிட்டுள்ள அறிக்கையில்,"ஒசாமாவை கொன்றதோடு விடயம் முடிந்துவிட்டது என்று மட்டும் அமெரிக்கர்கள் கருதி விட வேண்டாம். அவரைக் கொன்றதற்காக, யூதர்களையும் உங்களையும் மேலும் அதிகளவில் பழிவாங்குவோம்" என எச்சரிக்கை விடுத்துள்ளார்.