இலங்கையின் இயற்கை வளமான கடற்குதிரைகளை சமூக விரோதிகள் அழிக்கின்றார்கள்

by **நேசமுடன் ஹாசிம்** Fri 13 May 2011 - 10:24

இலங்கையை அண்டியுள்ள கடற்பிரதேசத்தில் இலாபத்தை மாத்திரமே குறிக்கோளாக கொண்டு கடல் வாழ் உயிரினங்களை பிடித்து வெளிநாடுகளுக்கு ஏற்றுமதி செய்து கொள்ளை இலாபமீட்டும் சில சமூக விரோத சக்திகளால் இலங்கை அன்னைக்கு இயற்கை தந்த கொடையான கடல் குதிரை மற்றும் அதனையொத்த தோற்றத்தையுடைய குழாய் வடிவான மீனினமும் மிக வேகமாக அழிந்து வருகின்றது.

கடல் குதிரைகளுக்கு 2004 ஆண்டு மே மாதம் 15ஆம் திகதியன்று, உலகில் பாதுகாக்கப்படும் ஒரு கடல் வாழ் உயிரினமாக பிரகடனம் செய்யப்பட்டது.

இவை பல வருடங்களைக் கொண்டவை. சில கடற்குதிரைகள் இள மஞ்சள் நிறமாகவும் சிவப்பு, மஞ்சள் மற்றும் சாம்பல் நிறமாகவும் இருக்கின்றன. வரிக்குதிரைகளில் இருப்பதை போன்ற வரிகளும், புள்ளிகளும் இவற்றின் உடம்பில் காணப்படுகின்றன.

குழாய் வடிவான மீனினம் கடலும் கடலேரியும் சங்கமமாகும் பகுதிகளிலும் கடற்புல் இருக்கும் ஆற்றுப்படுக்கைகளிலும் இவை வாழ்கின்றன. இவற்றின் நீளம் 1அங்குலம் முதல் 26 அங்குலத்திற்கும் இடைப்பட்டதாகும். இவை கூனி இறால், சிறிய பூச்சிகள், மீன்கள் புழுக்களை உண்கின்றன.

இவையும் கடற்குதிரையின் குடும்பத்தை சேர்ந்ததாக இருக்கின்ற போதிலும் வெவ்வேறு 200க்கு மேற்பட்ட இனங்களை கொண்டவையாகும். சீன சம்பிரதாய வைத்தியத்திற்கு அருமருந்தாக பயன்படுத்தப்படுகின்றது. அளவுக்கு அதிகமாக மீனை பிடிப்பதால் இன்று இந்த மீனினம் அழிவை எதிர்நோக்கியுள்ளது.

சுற்றாடலை பாதுகாப்பதில் அதிகம் ஆர்வம் கொண்ட சுற்றாடல் பாதுகாப்பு சட்ட அறிஞர் ஜகத் குணவர்த்தன கற்பிட்டியை அடுத்துள்ள கடற்பிரதேசத்தில் கடற்குதிரை அதிகமாக பிடித்து அவற்றை கருவாடாக்கி நல்ல விலைக்கு வெளிநாடுகளுக்கு ஏற்றுமதி செய்கிறார்கள். உலக சந்தையில் கருவாடாக்கப்பட்ட கடற்குதிரைக்கே நல்ல வரவேற்பு இருக்கின்றது என்றும் அதனால் கடற்குதிரைகள் வேகமாக அழிவடைகின்றன என்றும் கூறினார்.

ஹொங்கொங் நகரத்திற்கே கடற்குதிரைகள் ஏற்றுமதி செய்யப்படுகின்றன. அங்கிருந்து அவை ஐரோப்பா போன்ற நாடுகளுக்கு அனுப்பி வைக்கப்படுகின்றன. ஒரு கிலோ கடற் குதிரை கருவாட்டில் 500க்கு மேற்பட்ட கடற்குதிரைகள் இருக்கின்றன.

உள்ளூரில் கடற்குதிரைக்கு 5ரூபா விலை கொடுத்து வாங்கும் இந்த சமூக விரோத வர்த்தகர்கள் சர்வதேச சந்தையில் பல்லாயிரக்கணக்கான டொலர்களுக்கு விற்பனை செய்கிறார்கள். கடற்குதிரைகள் உடல் வலுவை பெருக்குவதற்கு சிறந்த மருந்தாக கருதப்படுகின்றது. காய்ந்த கடற்குதிரைகளை பொடியாக்கி அதனை மேற்கத்தைய நாட்டவர்கள் உட்கொள்கிறார்கள்.