மூன்று கதாபாத்திரத்தில் சோனியா அகர்வால்

காதல் கொண்டேன்" படம் மூலம் தமிழுக்கு அறிமுகமானவர் நடிகை சோனியா அகர்வால்.
இவரை தமிழுக்கு அறிமுகம் செய்து வைத்த இயக்குனர் செல்வராகவனை, காதலித்து திருமணம் செய்து கொண்டார். இடையில் அவர்களுக்குள் கருத்து வேறுபாடு ஏற்படவே விவாகரத்து செய்து கொண்டு பிரிந்து விட்டார்.



இதன்பிறகு திரையுலகில் மறு பிரவேசம் செய்த சோனியா அகர்வாலிற்கு "வானம்" படத்தில் இயக்குனர் கிரிஷ் வாய்ப்பு தந்தார். முன்பை விட தனது உடலின் எடையைக் குறைத்து சிக்கென்று இருக்கிறார். இது குறித்தும், இவரது அடுத்த படங்கள் குறித்தும் சோனியா அகர்வாலிடம் கேட்டதற்கு "முன்பு இருந்ததை விட 7 கிலோ உடல் எடையை குறைத்துள்ளேன். புரோட்டின் டயட்டில் இருக்கிறேன். முன்பை விட தற்போது அழகாக இருப்பதாக கருதுகிறேன்.

"வானம்" படத்திற்குப் பிறகு ரமேஷ் இயக்கும் "மாதா பிதா குரு" படத்தில் நடிக்க இருக்கிறேன். குழந்தைகளின் பிரச்சினையை மையமாக வைத்து இப்படத்தின் கதை பின்னப்பட்டுள்ளது. இப்படத்தில் முதல் முறையாக மூன்று வேடங்களில் நடிக்கிறேன். சாமியாரினியாகவும், வில்லியாகவும், தொலைக்காட்சி நிருபராகவும் நடிக்கிறேன். இப்படத்தில் புதுமுகம் ஒருவர் கதாநாயகனாக நடிக்கிறார். பெயரிடப்படாத இரண்டு தமிழ் படங்களிலும், ஒரு மலையாளப் படத்திலும் நடிக்க இருக்கிறேன்" என்றார்