வெறுமை உலகம்........

by **ஹாசிம்** Thu 26 May 2011 - 20:23

என் உலகின் நாயகியே
உனைத்துறந்ததால்
ஜடமாய் நானும்
திக்கற்று திசை மறந்து
புதுமை உலகில் சஞ்சரித்தது போல்
பிரமை வாழ்வுடன்
சங்கமித்திருக்கிறேன்

எம் உலகின் நினைவுகள்
நிதமும் நிழலாட
உணர்வுகள் இறுகிப்போய்
உன் பிரிவின் வலிகளால்
அமுதமும் நஞ்சாய்
உண்ண மனம் மறுத்து
உன் ஊட்டலின் சக்தியில்
உயிர் வாழ்கிறேனடி

எம் கூடலின் தித்திப்பில்
நாம் மயங்கிய நாட்களும்
எம் முத்தங்களின் அற்புதத்தில்
நாம் கண்ட ரசனையும்
எம் அணைப்பின் இறுக்கத்தில்
நாம் பிரிக்காத தேகமும்
பிரிந்த மாயமென்ன
என் கண்மணியே !

வாழ்வின் துயர்கள்
எம்மையும் தொற்றியதால்
எதிர்கால வாழ்வுக்காய்
காலம் எம்மை பிரித்தாலும்
நாட்களின் வேகம்
எம்மை ஒன்று சேர்க்கும் வரை
இன்று நாம் வாழும்
வெறுமை உலகை
நினைவுகளின் உணர்வுகளுடன்
வளமாக்குவோம்