இலங்கை விஜயத்துக்கு முன் சிவசங்கர் மேனன்-ஜெயலலிதா இன்று மாலை அவசர சந்திப்பு

by **நேசமுடன் ஹாசிம்** Thu 9 Jun 2011 - 20:50

நாளை இடம்பெறவுள்ள இந்திய உயர்மட்டக்குழுவினரின் இலங்கை விஜயத்துக்கு முன்பாக இன்று இந்தியாவின் தேசியப் பாதுகாப்பு ஆலோசகர் சிவசங்கர் மேனன் மற்றும் தமிழ்நாடு முதலமைச்சர் ஜெயலலிதா ஆகியோருக்கிடையில் அவசர சந்திப்பொன்று ஏற்பாடாகியுள்ளது. இந்தியாவின் வெளியுறவுச் செயலாளர் நிரூபமா ராவ், தேசியப் பாதுகாப்பு ஆலோசகர் சிவசங்கர் மேனன்,பாதுகாப்புச் செயலாளர் பிரதீப் குமார் ஆகியோரைக் கொண்ட இந்திய உயர்மட்டக்குழுவொன்று நாளை இலங்கைக்கு விஜயம் செய்யவுள்ளது.

இதற்கிடையே நேற்று தமிழக சட்டசபையில் இலங்கை அரசாங்கத்தின் மீது பொருளாதாரத் தடை விதிக்க வேண்டுமெனக் கோரி தீர்மானம் நிறைவேற்றப்பட்டுள்ள நிலையில், இலங்கைக்கான உயர்மட்டக்குழுவில் இடம்பெற்றுள்ள சிவசங்கர் மேனனை உடனடியாக ஜெயலலிதாவைச் சந்தித்துக் கலந்துரையாட இந்திய மத்திய அரசாங்கம் அனுப்பி வைத்துள்ளது.

அதற்கேற்ப இன்று மாலை நடைபெறும் ஜெயலலிதா - சிவசங்கர் மேனன் சந்திப்பின் பின்பே நாளை இந்திய உயர்மட்டக்குழுவின் இலங்கை விஜயம் இடம்பெறும் என்று கூறப்படுகின்றது. அதேநேரம் 1971ம் ஆண்டில் இருநாடுகளுக்கிடையிலான புரிந்துணர்வு ஒப்பந்தமொன்றின் இலங்கையிடம் கையளிக்கப்பட்ட கச்சதீவை மீளப் பெற வேண்டும் என்றும் தமிழ்நாடு முதலமைச்சர் ஜெயலலிதா இன்று அறிவித்தலொன்றை விடுத்துள்ளார்.