தங்கப் புதையல் - கதை

ஒரு ஊரில் சோமு என்ற மூடன் இருந்தான். ஒரு நாள் தன் வீட்டிற்கு நடந்து சென்று கொண்டிருக்கையில் வழியில்

அவனுக்கு ஒரு குடம் நிறைய தங்கம் கிடைத்தது. அவன் பெரும் வியப்புற்றான், ஆனாலும் "யாரவது இதை திருடி விடுவார்களே" என்று எண்ணி வருந்தினான்.

அக் குடத்தை இறுக்கமாக கையில் அணைத்தபடி, "இதை எப்படி மறைத்து வைப்பது?" என்று சிந்தித்தவாறே வீட்டை நோக்கி நடந்தான். வீட்டை அடைந்ததும் சோமுக்கு ஒரு நல்ல யோசனை தோற்றியது. அதன் படி தன் வீட்டின் பின்புறத்தில் உள்ள பெரிய மரத்தடிக்கு சென்று அங்கு மண்ணை தோண்டி குழியாக்கினான். பின் யாரும் பார்க்காதவாறு தங்கம் நிறைந்த அக்குடத்தை குழியில் புதைத்து வைத்தான் சோமு.

உடனே ஓர் அறிவிப்பு பலகையை எடுத்து அதில் "இங்கே தங்கப் புதையல் தோண்டக் கூடாது" என்று எழுதி, தான் புதைத்த இடத்தில் நிறுவினான். அதன் பின் தன் பொருட்களை எடுத்துக் கொண்டு சந்தோஷமாக வீட்டுகுள் சென்றான்.

இரவானதும் சோமு நன்றாக உறங்கிக் கொண்டிருந்த சமயம், ஒருவன் அவ் மரத்தடியை கடந்து போக வந்தான், அப்போது சோமு எழுதி வைத்திருந்த அறிவிப்பு பலகையை கவனித்தான். சற்றும் தாமதிக்காமல் அவ்விடத்தை தோண்டி சோமு புதைத்து வைத்திருந்த தங்கம் நிறைந்த குடத்தை கண்டேடுத்தான். பின் அவன் அப் பலகையில் "நான் உங்களது தங்கத்தை எடுக்கவில்லை" என்று எழுதி வைத்தான். "அந்த முட்டாள் தங்கப் புதையலை காணாது தேடுவான்", என்று தனக்குள் சிரித்துக் கொண்டு அங்கிருந்து சென்றான்.

அடுத்த நாள் காலை சோமு எழுந்த உடனேயே குடத்தை புதைத்து வைத்திருந்த இடத்துக்கு விரைந்தான். அங்கே தான் எழுதி வைத்திருந்த அறிவுப்பு இல்லாமல் வேறு ஏதோ எழுதி இருப்பதைக் கண்டான், "தங்கத்தை யாரும் எடுத்திருக்க மாட்டார்கள்" என்று எண்ணி அவ்விடத்தை தோண்டினான், ஆனால் அவனுக்கு ஏமாற்றமே மிஞ்சியது.

அங்கு புதைத்து வைத்திருந்த தங்கம் நிறைந்த குடத்தை காணததைக் கண்டு கவலையடைந்தான். சோமுவின் முட்டாள் தனத்தால் அவனது தங்கத்தை இழந்தான். ஆனால் இன்று வரை சோமுக்கு ஆச்சரியமான விடயம் யார் துல்லியமாக இவ்விடத்தை கண்டு பிடித்து புதையலை எடுத்திருப்பார்கள் என்பதுதான்.

மாமா கதை நல்லா இருக்கு தொடருங்கள் மாமா