அரிசியில் ஆசனிக் அமிலம் எதுவும் கலக்கப்படவில்லை

by **நண்பன்** Wed 15 Jun 2011 - 12:51

அரிசியில் ஆசனிக் அமிலம் எதுவும் கலக்கப்படவில்லை
அரிசி மூடைகளை பரிசோதித்து அறிக்கை; அமைச்சரவை உப குழுவில் ஒப்புவிப்பு
லோரன்ஸ் செல்வநாயகம்
அரிசியில் ஆசனிக் அமிலம் கலந்துள்ளதாக முன்னெடுக்கப்பட்டு வரும் பிரசாரங்கள் உண்மைக்குப் புறம்பானவை என அரசாங்கம் அறிவித்துள்ளது.

இதனை ஜனாதிபதி மஹிந்த ராஜபக்ஷ முன்னிலையில் ஒப்புவித்துள்ளதுடன் அறுபது அரிசி மூடைகளைப் பரிசோதனை செய்து ஆசனிக் அமிலம் அரிசியில் கலக்கப்படவில்லை என்பதை உறுதி செய்ததாகவும் ஆராய்ச்சி மற்றும் அபிவிருத்திக்கான பணிப்பாளர் நிமல் திசாநாயக்க தெரிவித்துள்ளார்.

ஜனாதிபதி மஹிந்த ராஜபக்ஷவின் தலைமையில் அலரி மாளிகையில் நடைபெற்ற உணவு பாதுகாப்பு மற்றும் வாழ்க்கைச் செலவைக் கட்டுப்படுத்துவதற்கான அமைச்சரவை உப குழுவின் முன்னிலையில் அவர் இதனை உறுதிப்படுத்தியுள்ளார்.

அதனையடுத்து இந்த பரிசோதனை முடிவுகளை பொதுமக்களுக்குப் பகிரங்கப்படுத்துமாறு ஜனாதிபதி மஹிந்த ராஜபக்ஷ அவர்கள் சம்பந்தப்பட்ட அதிகாரிகளுக்குப் பணிப்புரை விடுத்துள்ளார். அண்மைக்காலமாக அரிசி மற்றும் அரிசியின் மூலம் தயாரிக்கப்படும் உணவு பாவனை அதிகரித்துள்ளது. அதன் உற்பத்தி மற்றும் விநியோகங்களும் அதிகரிக்கப்பட்டுள்ளன.

மக்கள் மத்தியில் அரிசி உணவு முக்கியத்துவம் பெற்றுவரும் இச் சந்தர்ப்பத்தில் அதனைச் சீர்குலைக்கும் சதி முயற்சியில் இறங்கியுள்ள மா இறக்குமதி பல்தேசியக் கம்பனிகளின் பிரசாரமே இதுவெனவும் நிமல் திசாநாயக்க தெரிவித்துள்ளார். அரிசியில் ஆசனிக் அமிலம் கலந்துள்ளதா எனும் பரிசோத னையை தொழில்நுட்ப ஆராய்ச்சி நிறுவனம் மேற்கொண்டுள்ளதுடன் அதன் பிணப்பாளர் ஏ. எம். முபாரக்கும் இதனை உறுதிப்படுத்தியுள்ளார்.

இதேவேளை, ஆசனிக் அமிலம் கலக்கப்பட்டுள்ளதாவென 28 கிருமி நாசினி வகைகள் பரிசோதனைக்கு உட்படுத்தப்பட்டு அதில் இரண்டு வகை கிருமிநாசினிகளில் சிறிது ஆசனிக் அமிலம் கலந்திருந்தமை கண்டுபிடிக்கப்பட்டு அந்த இரு வகை கிருமிநாசினியினதும் விற்பனை மற்றும் விநியோக நடவடிக்கைகள் தடைசெய்யப்பட்டுள்ளதென வும் இதன் போது கிருமிநாசினி தொடர்பான பதிவாளர் அநுர விஜேசேகர குறிப்பிட்டுள்ளார்.