ஒட்டன்சத்திரம் அருகே பரிதாபம் லாரிகளுக்கு இடையே சிக்கி ஆம்னி வேன் நொறுங்கியது

ஒட்டன்சத்திரம்: ஒட்டன்சத்திரம் அருகே 2 லாரிகளுக்கிடையே ஆம்னி வேன் சிக்கி நசுங்கியது. இதில் டிரைவர், 2 தொழிலதிபர்கள் பரிதாபமாக இறந்தனர்.
மதுரை மாவட்டம், உசிலம்பட்டியில் நடந்த துக்க நிகழ்ச்சியில் பங்கேற்பதற்காக கோவையில் இருந்து சிலர் ஆம்னி வேனில் வந்தனர். அவர்களை இறக்கி விட்டு மீண்டும் கோவை கிளம்பியது. இதில் உசிலம்பட்டியைச் சேர்ந்த தொழிலதிபர் கள் செந்தில்வேல்(35) மோகன்(55) இருவரும் திண்டுக்கல் மாவட்டம், ஒட்டன்சத்திரம் அருகே நாகனம்பட்டியில் நடக்கும் கோயில் திருவிழாவில் பங்கேற்பதற்காக ஏறிக்கொண்டனர். வேனை சந்தோஷ்குமார் ஓட்டினார்.
நேற்று அதிகாலை 2 மணியளவில் ஒட்டன்சத்திரம் ரயில்வே கேட் அருகே வந்தபோது முன்னால் சென்ற காஸ் டேங்கர் லாரியை ஆம்னி வேன் முந்த முயன்றது. அப்போது எதிரே வந்த வாகனத்துக்கு வழிவிட சந்தோஷ்குமார் வேனை திருப்பினார். இதனால் நிலைகுலைந்த வேன், திடீரென டேங்கர் லாரி மீது மோதியது. அதேநேரம் பருப்பு ஏற்றி வந்த மற்றொரு லாரி, ஆம்னியின் பின்புறமாக மோதியது. 2 லாரிகளுக்கும் இடையில் சிக்கிய ஆம்னி அப்பளம் போல் நொறுங்கியது. இந்த விபத்தில், ஆம்னியில் இருந்த 3 பேரும் உடல் நசுங்கி உயிரிழந்தனர். ஒட்டன்சத்திரம் தீயணைப்பு படையினர் விரைந்து வந்து போராடி உடல்களை மீட்டனர்.
போலீசார் வழக்குப்பதிவு செய்து பருப்பு ஏற்றி வந்த லாரி டிரைவர் பொள்ளாச்சி லோகநாதனை (29) கைது செய்து விசாரிக்கின்றனர்.

:!#: