இலங்கைக்கான வீசா கட்டணத்தை குறைக்குமாறு இந்தியா கோரிக்கை

by **நேசமுடன் ஹாசிம்** Mon 24 Oct 2011 - 6:45

இலங்கைக்கு வரும்போது அறவிடப்படும் வீசா கட்டணத்தைக் குறைப்பதற்கு நடவடிக்கை எடுக்கவேண்டுமென இந்தியா இலங்கையிடம் கோரிக்கை விடுத்துள்ளது. இது தொடர்பான பேச்சுவார்த்தையொன்று கடந்த வெள்ளிக்கிழமை கொழும்பில் இடம்பெற்றதாக உத்தியோகபூர்வ வட்டாரங்கள் தெரிவித்தன.

இலங்கை விசாவுக்கு விண்ணப்பிக்கும் இந்தியர்களிடமிருந்து 50 அமெரிக்க டொலர்களை அறவிடும் புதிய நடைமுறை யொன்றை இலங்கை அமுல்படுத்தியுள்ளது.

எனினும், சார்க் உறுப்பு நாடுகள் தமது நாடுகளுக்கிடையில் குறைந்த வீசாக் கட்டணத்தையே அறவிட்டு வருவதால், இந்தியாவிலிருந்து வருபவர்களின் வீசா கட்டணத்தைக் குறைப்பதற்கும் நடவடிக்கை எடுக்கவேண்டுமென இந்திய உயர்ஸ்தானிகராலய அதிகாரிகள், இலங்கை உயர்மட்ட அதிகாரிகள் குழுவிடம் கோரிக்கை விடுத்துள்ளதாகத் தெரிய வருகிறது.

இந்த விடயத்தை இலங்கைப் பாதுகாப்புச் செயலாளரின் கவனத்துக்குக் கொண்டுசென்றிருப்பதாகவும் தெரியவருகிறது. இலங்கைக்கு வரும் உல்லாசப் பயணிகளின் எண்ணிக்கையை ஒப்பிட்டுப் பார்க்கையில் பிரித்தானியாவுக்கு அடுத்ததாக இந்தியாவிலிருந்தே அதிகமான உல்லாசப் பயணிகள் இலங்கைக்கு வருகின்றனர். இந்த நிலையிலேயே வீசாக் கட்டணத்தைக் குறைக்குமாறு கோரிக்கை விடுக்கப்பட்டுள் ளது. சார்க் அமைப்பில் அங்கம் வகிக்கும் நாடுகள் தமது நாடுகளுக்கிடையில் வீசாவுக்குக் குறைந்தளவு கட்டணத்தையே அறவிட்டுவருகின்றன.

இந்தியாவின் இந்தக் கோரிக்கை குறித்து இலங்கை அரசாங்கம் சாதகமாகப் பதிலளிக்கும் என்று கடந்த வெள்ளிக்கிழமை நடைபெற்ற பேச்சுவார்த்தையில் பதிலளிக்கப்பட்டிருப்பதாக தகவலறிந்த வட்டாரமொன்று கூறியது.