தமிழக போலீசில் விரைவில் வருகிறது அதிரடி மாற்றம்?

by **நேசமுடன் ஹாசிம்** Sun 30 Oct 2011 - 6:48

தமிழகத்தில் உள்ளாட்சித் தேர்தல் முடிவு பெற்றுள்ளதையடுத்து, தமிழக போலீசில் அடுத்த கட்ட மாற்றம் இருப்பதாகத் தெரிகிறது. இதற்கான பணிகள் விரைவாக நடந்து வருகின்றன. தமிழகத்தில் அ.தி.மு.க., அரசு பொறுப்பேற்றதும், தமிழக போலீசில் தலைமை பொறுப்பு முதல் இன்ஸ்பெக்டர்கள் வரையில் பல்வேறு படிநிலைகளில் இருந்த அதிகாரிகள் மாற்றப்பட்டனர்.

கடந்த ஆட்சியில், ஆட்சியாளர்களுக்கு சார்பாக செயல்பட்ட சில அதிகாரிகள் பல்வேறு இடங்களுக்கு மாற்றப்பட்டனர். மதுரை, திருச்சி, கோவை உள்ளிட்ட மாநகர்களுக்கு திறமையான, எந்த சூழலையும் சமாளிக்கக் கூடிய அதிகாரிகள் நியமிக்கப்பட்டனர். அதே போல், கடந்த ஆட்சிக் காலத்தில் அ.தி.மு.க., ஆதரவு அதிகாரிகள் என்று ஓரங்கட்டி வைக்கப்பட்டிருந்த பல அதிகாரிகள், மீண்டும் வரவழைக்கப்பட்டு தகுதியான பணியில் நியமிக்கப்பட்டனர்.

சென்னை மாநகரைப் பொறுத்தவரை, புதிய அரசு பொறுப்பேற்ற அன்றே கமிஷனர் மாற்றப்பட்டார். அதைத் தொடர்ந்து கூடுதல் கமிஷனர்கள், துணை கமிஷனர்களில் இருந்து இன்ஸ்பெக்டர்கள் வரையில் அனைவருமே மாற்றப்பட்டனர். புறநகரிலும் மாற்றம் நடந்தது. இந்நிலையில், இரண்டு போலீசும் இணைக்கப்பட்டு சென்னை பெருநகர் போலீஸ் உருவாக்கப்பட்டு, நான்கு மண்டலங்கள் பிரிக்கப்பட்ட நிலையில், புதிய பதவியிடங்களும் உருவாக்கப்பட்டு அதில் அதிகாரிகள் நியமிக்கப்பட்டனர். சென்னை மத்திய குற்றப்பிரிவிற்கு இணை கமிஷனர் பதவியிடம் உருவாக்கப்பட்டு, அதில் பொன் மாணிக்கவேல் நியமிக்கப்பட்டு, தற்போது உளவுப்பிரிவு டி.ஐ.ஜி.,யாக மாற்றப்பட்டுள்ளார்.குற்றம் மற்றும் தலைமையிடம் இரண்டிற்கும் தனித்தனி கூடுதல் கமிஷனர்கள் நியமிக்கப்பட்டனர்.

நுண்ணறிவுப் பிரிவிற்கு புதிய இணை கமிஷனரும், கூடுதலாக ஒரு உதவி கமிஷனரும் நியமனம் செய்யப்பட்டனர். இவ்வாறாக, தமிழகம் முழுவதும் புதிய அதிகாரிகள் நியமிக்கப்பட்டு, சட்டம்-ஒழுங்கு மற்றும் குற்றச் சம்பவங்கள் குறைப்பதற்கு நடவடிக்கை எடுக்கப்பட்டன.இதற்கிடையில், பரமக்குடி, கூடங்குளம் பிரச்னைகள் ஒரு பக்கம் சிறிய பிரச்னைகளை ஏற்படுத்தினாலும், உள்ளாட்சித் தேர்தலை சுமுகமாக நடத்தி முடிக்க வேண்டிய சவால், தமிழக போலீசிற்கு உருவானது.

கடந்த 2006ம் ஆண்டு உள்ளாட்சித் தேர்தல் போலல்லாமல், ஆங்காங்கே சிறிய பிரச்னைகள் இருந்தாலும், உள்ளாட்சித் தேர்தலையும் அமைதியாக நடத்தி முடித்தது தமிழக போலீஸ். முன்னதாக, உள்ளாட்சித் தேர்தல் முடிந்ததும் போலீஸ் அதிகாரிகள் மாற்றம் இருக்கும் என்ற கருத்து நிலவியது. இந்த கருத்தை உண்மையாக்கும் விதமாக கூடுதல் டி.எஸ்.பி.,க்கள் 10க்கும் மேற்பட்டோருக்கு எஸ்.பி., பதவி உயர்வு பட்டியல் தயாராகியுள்ளதாகக் கூறப்படுகிறது.

எனவே, மாவட்ட அளவில் எஸ்.பி.,க்கள் மற்றும் மாநகர்களில் துணை கமிஷனர்கள் மாற்றப்படலாம். அதைத் தொடர்ந்து, கூடுதல் டி.ஜி.பி.,க்கள், ஐ.ஜி.,க்கள், டி.ஐ.ஜி.,க்கள் முதல் உதவி கமிஷனர்கள் வரையில் மாற்றம் இருக்கும் என்றும் கூறப்படுகிறது. சென்னை மாநகர் மட்டுமல்லாமல், தமிழகத்தில் பல்வேறு பகுதிகளில் இன்னும் தி.மு.க., ஆதரவு இன்ஸ்பெக்டர்கள், உதவி கமிஷனர்கள் பலர் கோலோச்சிக் கொண்டிருப்பதாக போலீஸ் தலைமைக்கு தகவல் சென்றுள்ளதால், இன்னும் சில வாரங்களில் முழுமையான மாற்றங்கள் இருக்கலாம் என்றும் தெரிகிறது.அடுத்ததாக ஜனவரி மாதத்தில், கூடுதல் டி.ஜி.பி.,க்கள் சிலர் டி.ஜி.பி.,க்களாகவும், ஐ.ஜி.,க்கள் சிலர் கூடுதல் டி.ஜி.பி.,க்களாகவும் பதவி உயர்வு பெறுகின்றனர். அதைத் தொடர்ந்து, உயர் அதிகாரிகள் அளவில் மாற்றம் செய்ய வேண்டியுள்ளதால், தற்போது செய்யப்பட உள்ள மாற்றம் அதற்கு ஏதுவாக இருக்கும் என்று கூறப்படுகிறது.