வெள்ளத்தில் பாதிக்கப்பட்ட அனைவருக்கும் நிவாரணம் என்றபோதும் இதுவரை வழங்கப்படவில்லை! மக்கள் கவலை

மட்டக்களப்பில், கடந்த வாரத்தில் ஏற்பட்ட வெள்ளம் காரணமாக பாதிக்கப்பட்ட அனைவருக்கும் நிவாரணங்கள் வழங்கப்பட வேண்டும் என அரசாங்கம் அறிவித்துள்ள போதும் அதிகாரிகள் அதனை வழங்குவதற்கு விருப்பம் காட்டுவதாக இல்லை என பொதுமக்கள் கவலை தெரிவிக்கின்றனர்.

மாவட்டத்தின் அனைத்து பகுதிகளுமே வெள்ளம் காரணமாக பாதிக்கப்பட்ட நிலையில் ஒரு தொகை மக்கள் பாடசாலைகளிலும் பொது இடங்களில் அமைக்கப்பட்ட முகாம்களிலும், நண்பர்கள் உறவினர்கள் வீடுகளில் ஒரு பெருந்தொகையினரும் தங்கியிருந்தனர்.

அதேநேரம் தமது வீடுகளில் இருந்த மிஞ்சியிருந்த ஒரு சில பொருள்களையேனும் பாதுகாக்க வேண்டும் என்ற அச்சம் காரணமாக தமது சொந்த வீடுகளிலும் பாதிக்கப்பட்டவர்கள் தங்கியிருந்தனர்.

இருப்பினும் தமது வீடுகளிலும் உறவினர்கள் வீடுகளிலும் தங்கியிருந்தவர்களுக்கு நிவாரணப் பொருள்கள் வழங்கப்படமாட்டாது என கிராம சேவையாளர்களும், பிரதேச செயலாளர்களும் கூறியதாக பொதுமக்கள் கவலை தெரிவிக்கின்றனர்.

அத்துடன் பாடசாலைகளில் அமைக்கப்பட்டிருந்த முகாம்களில் இருந்தும் விரைவாக வெளியேறிச் செல்லுமாறும் சில இடங்களில் கிராம சேவையாளர்களால் பொதுமக்கள் வற்புறுத்தப்பட்டதாகவும் தெரிவிக்கப்படுகிறது.

அரசாங்கம் வழங்கும் படி கூறும் நிவாரணங்களை தமது சொந்தப் பணத்தை கொடுப்பது போன்று ஏன் அதிகாரிகள் மறுக்கின்றனர் எனக் கேள்வி எழுப்பும் பொது மக்கள் பொலிஸாரோ அல்லது இராணுவத்தினரோ இந்த நிவாரணங்களை வழங்கும் நடவடிக்கைகளில் ஈடுபடுவது சிறப்பாக இருக்கும் என கோரிக்கை விடுக்கின்றனர்.

மட்டக்களப்பு சிரேஸ்ட பொலிஸ் அத்தியட்சகர் பொதுமக்களைப் பார்வையிட முகாம் ஒன்றுக்குச் சென்றவேளை இந்க் கோரிக்கையினை மக்கள் விடுத்துள்ளனர்.

இல்லையேல் அதிகாரிகளிடம் வழங்கும் படி கூறும் நிவாரணங்களை அமைச்சர்களே நேரடியாக வழங்குவது வீணடிப்புகளுக்கும் சுருட்டுதல்களுக்கும் ஏதுவான காரணங்கள் இல்லாது ஆக்கும் எனவும் கோரிக்கை விடுக்கின்றனர்.

மட்டக்களப்பு மாவட்டத்தில் இன்னமும் முழுமையாக வெள்ள நீர்வடிந்துவிடவில்லை என்பது குறிப்பிடத்தக்கது.