கனிமொழி பிணை பிரச்சினையில் நீதி தாமதிக்கப்படுகிறது

மாநிலங்களவை உறுப்பினரும், தங்கள் மகளுமான கனிமொழி உள்ளிட்டோருக்கு ஜாமீன் மறுக்கப்படுவது பற்றி? கனிமொழி உள்ளிட்ட எட்டு பேருக்கு 3.11.2011 ல் டில்லி சிறப்பு நீதிமன்றத்தில் பிணை மறுக்கப்பட்டுள்ளது குறித்து முதலில் நான் கருத்து செல்வதை விட காங்கிரஸ் கட்சியின் பொதுச் செயலாளர் திக் விஜய் சிங், சட்டப்படி தண்டிக்கப்படாத ஒருவரை நீண்ட காலம் சிறையிலே வைத்திருப்பது எந்த வகையில் சரியானது?

விசாரணைக் கைதிகளுக்கு பிணை வழங்காமல் சிறையில் அடைத்து வைத்திருப்பது சரியான நடைமுறையல்ல என்று செய்தியாளர்களிடம் கூறியதோடு, குற்றஞ்சாட்டப்பட்டவர்கள் அனைவரும் ஜாமீனில் வெளிவருவதற்கான உரிமை உள்ளது. என்று ஒரு வழக்கில் முன்னாள் உச்ச நீதிமன்ற தலைமை நீதிபதி வி. ஆர். கிரஷ்ணய்யர் அளித்துள்ள உத்தரவைச் சுட்டிக்காட்டி அந்த நடைமுறையை நீதித்துறை கவனத்திலே கொள்ள வேண்டும் என்றும் வலியுறுத்தியிருக்கிறார்.

மத்திய அரசின் முன்னாள் சட்ட அமைச்சரும், உச்ச நீதிமன்றத்தின் மூத்த வழக்கறிஞருமான ராம் ஜேத்மலானி கனிமொழிக்கு பிணை மறுக்கப்பட்டிருப்பது மிகக் கடுமையான சட்ட விதிமுறை மீறல், இவ்விவகாரத்தில் வேண்டுமென்றே சட்டம் தவறாகப் பயன்படுத்தப்படுகிறது. இது நீதியை தடம் புரளச் செய்யும் காரியமாகிவிட்டது.

குற்றஞ்சாட்டப்பட்டோர் ஓடி மறைந்து விடுவர் அல்லது சாட்சியங்களை கலைத்து விடுவர் என்ற சூழ்நிலைகளின் போது தான் பிணை மறுக்கப்படும். ஆனால் இந்தப் பெண், கனிமொழியைப் பொறுத்த வரையில் இவ்வாறு சந்தேகப்படுவதற்கு எந்தவிதமான ஆதாரமுமில்லை என்று கருத்து தெரிவித்துள்ளார்.

முன்னாள் கூடுதல் சொலிசிட்டர் ஜெனரல் ராஜ் ராமச்சந்திரன், நீதிபதியின் தீர்ப்பைக் கேட்டு பெரும் ஏமாற்றமடைந்தேன். இதை நான் எதிர்பார்க்கவில்லை. குற்றவாளி யாராக இருந்தாலும் பிணை வழங்குவது சட்டப்படி வழக்கமான ஒன்று என்று கருத்து தெரிவித்திருக்கிறார். உச்ச நீதிமன்றத்தின் மற்றொரு மூத்த வழக்கறிஞர் அமான் லேக்கி, தொடர்ந்து சிறையில் வைப்பது சரியல்ல பிணை மறுப்புக்கு சரியான காரணம் கூறப்படவில்லை என்று கருத்து வெளியிட்டுள்ளார்.

முன்னாள் ஐ. பி. எஸ். அதிகாரியும், சி. பி. ஐ. அமைப்பில் பல ஆண்டு காலம் முக்கியப் பொறுப்பில் இருந்தவருமான வி. ஆர். லட்சுமிநாராயணன், தி. மு. க. எம்.பி. கனிமொழி மற்றும் ஏழு பேருக்கு டெல்லி சி. பி. ஐ. சிறப்பு நீதிமன்றம் ஜாமீன் தர மறுத்திருப்பதை எந்த வகையிலும் நியாயப்படுத்திட முடியாது. முழு விசாரணை தொடங்குவதற்கு முன்பு குற்றஞ்சாட்டப்பெற்றோர் தொடர்ந்து சிறையிலே இருந்திட வேண்டுமென்று வலியுறுத்துவது இந்திய உச்ச நீதிமன்றம் வகுத்து அளித்துள்ள வழிமுறைகளின்படி ஆச்சரியமாக இருப்பது மட்டுமல்லாமல்,

அது ஏற்றுக்கொள்ள முடியாததும் கூட. இப்போதும்கூட, உச்ச நீதிமன்றத்தின் சொற்களான பிணை என்பது விதிமுறைகளின்படி வழங்கப்பட வேண்டிய ஒன்று. சிறையிலேயே இருக்க வேண்டுமென்பது விதிகளுக்குப் புறம்பானது. என்னுடைய செவிகளில் ஒலித்துக் கொண்டிருக்கின்றன என்று எழுதியிருக்கிறார். ஆங்கில நாளேடான தி இந்து 4.11.2011 நாளிட்ட தனது தலையங்கத்தில் 2 ஜி வழக்கில் கனிமொழி உள்ளிட்டோருக்கு மீண்டும் பிணை மறுக்கப்பட்டிருப்பது குற்றவியல் சட்டத்தின் அடிப்படை நெறிமுறைகளுக்கு முற்றிலும் எதிரானது என்று எழுதியிருக்கிறது.

2 ஜி வழக்கைப் பொறுத்தவரையில் புலன் விசாரணை முடிந்து விட்டது.