வருமா மெகா கூட்டணி?

வரும் லோக்சபா தேர்தலில் தி.மு.க., தலைமையில், "மெகா கூட்டணி' அமைக்க அச்சாரம் போடும் வகையில், 17 கட்சிகளின் தலைவர்கள் இன்று சென்னையில் "கை'கோர்க்க உள்ளனர்.
ஓரிரு ஆண்டுகளில் வரவுள்ள லோக்சபா தேர்தலுக்கு, "குறி' வைத்து அரசியல் கட்சிகள், "கூட்டணிக் காய்'களை நகர்த்த ஆரம்பித்து விட்டன. இருப்பினும், இடையில் வந்த உள்ளாட்சித் தேர்தலில் அனைத்துக் கட்சிகளும் தனி ஆவர்த்தனம் செய்ததால், நிலைமை மாறிப் போய் இருக்கிறது. இதனால், லோக்சபா தேர்தலில் தனித்துப் போட்டியிடும் வாய்ப்பு உண்டா? என்ற கேள்வியும் எழுந்துள்ளது.

சந்திப்புகள் தந்த சிந்திப்பு: பா.ஜ., கட்சியின் அகில இந்திய தலைவர் நிதின் கட்காரியை சமீபத்தில் தி.மு.க., பொருளாளர் ஸ்டாலின் சந்தித்து பேசினார். முன்னாள் துணை பிரதமர் அத்வானியின் ரத யாத்திரை, குஜராத் முதல்வர் மோடியின் உண்ணாவிரத நிகழ்ச்சியில் அ.தி.மு.க., பார்லிமென்ட் குழுத் தலைவர் தம்பிதுரை பங்கேற்று, ஆதரவு தெரிவித்தார். இந்த சந்திப்புகளை வைத்து, கட்சிகளும், கூட்டணிகளும் இடம்பெயருமோ என்ற சிந்தனை, அரசியல் நோக்கர்களுக்கு வந்துள்ளது. இப்போதைக்கு மத்தியில் ஆட்சியை தக்க வைப்பதற்காக, தி.மு.க., அணியில் காங்., நீடிக்கும் என்று காங்கிரசார் சொல்லி வந்தாலும், தேர்தல் வந்தால் அ.தி.மு.க., பக்கம் ரூட் போடுவதற்கும் இப்போதே துண்டு போடும் முயற்சியும் நடக்கிறது. இதற்காகத்தான், அவ்வப்போது, முதல்வர் ஜெயலலிதாவும், மத்திய அரசுக்கு மிரட்டல் விடுக்கும் வகையில் பா.ஜ., பக்கம் நேசக்கரம் நீட்டுவதற்கும் முயன்று வருகிறார்.

"கை' கழுவினால்...: இதற்கிடையில், இரு கழகங்களும் காங்., கட்சியை கை கழுவினால், காங்கிரஸ், தே.மு. தி.க.,வை இணைத்து மாற்று அணி அமைக்க வாய்ப்பு உள்ளதாகக் கணிக்கப்படுகிறது. லோக்சபா தேர்தலை பொறுத்தவரையில், மத்தியில் பிரதமர் யார்? என்ற கோஷத்தை முன் வைக்கும் கட்சிகள் தான் வெற்றி பெறும் என்பதால், தேசியக் கட்சிகளுடன் கூட்டணி வைக்க வேண்டிய நிர்பந்தம், திராவிடக் கட்சிகளுக்கு ஏற்பட்டுள்ளது. கூட்டிக் கழித்து பார்க்கும்போது, லோக்சபா தேர்தலில் அனைத்து கட்சிகளும் கூட்டணி அமைத்து தான் போட்டியிடும் என்பது உறுதியாகியுள்ளது. அதற்கு முன்னோட்டமாக, மெகா கூட்டணி அமைவதற்கு ஒத்திகை பார்க்கும் வகையில், இன்று சென்னையில், 17 கட்சிகளின் தலைவர்களும் ஒரே மேடையில் சந்திக்க வாய்ப்பு வந்துள்ளது. இதை வைத்து பலரும், கண், மூக்கு, வாய் வைத்து அதற்கு உருவம் கொடுக்க முயற்சிக்கின்றனர்.

விசாரணை அறிக்கை: பரமக்குடி, மதுரை, இளையான்குடி உள்ளிட்ட இடங்களில் நடந்த துப்பாக்கிச் சூடு சம்பவத்தின் போது விசாரணை அறிக்கை வெளியிடும் நிகழ்ச்சி, இன்று மாலை லயோலா கல்லூரியில் நடக்கிறது. விசாரணை அறிக்கையை மும்பையைச் சேர்ந்த நீதிபதி சுரேஷ் வெளியிடுகிறார். இந்த அறிக்கை குறித்து, அரசியல் கட்சிகளின் தலைவர்கள் தங்களது கருத்துக்களை பதிவு செய்கின்றனர். தி.மு.க., பொருளாளர் ஸ்டாலின், ம.தி.மு.க., பொதுச் செயலர் வைகோ, பா.ம.க., நிறுவனர் ராமதாஸ், விடுதலைச் சிறுத்தைகள் பொதுச் செயலர் திருமாவளவன், இந்திய கம்யூனிஸ்ட் கட்சியின் மூத்த தலைவர் நல்லகண்ணு, மார்க்சிஸ்ட் கம்யூனிஸ்ட் கட்சியின் செயலர் ராமகிருஷ்ணன், மனித நேய மக்கள் கட்சியின் தலைவர் ஜவாஹிருல்லா, சமத்துவப் படை தலைவர் சிவகாமி மற்றும் உதிரி கட்சிகளின் தலைவர்கள் உட்பட மொத்தம் 17 கட்சிகளின் தலைவர்கள் ஒரே மேடையில் பங்கேற்கின்றனர்.

வருமா மெகா கூட்டணி: நீண்ட இடைவெளிக்கு பின், குறிப்பாக ஆறு ஆண்டுகள் கழித்து, எதிரும், புதிருமாக இருந்த தலைவர்களான ஸ்டாலினும், வைகோவும் ஒரே மேடையில் சந்திப்பதும், ராமதாஸ், கம்யூனிஸ்ட் கட்சித் தலைவர்கள் மீண்டும் கூடிப் பேசுவது, லோக்சபா தேர்தலில் மெகா கூட்டணி அமைவதற்கு அச்சாரமாக அமையுமா? என்ற கேள்வி எழுந்துள்ளது.