எகிப்தில் இரண்டாம் கட்ட தேர்தல் ஆரம்பம்

எகிப்தின் கீழ் சபைக்கான இரண்டாம் கட்ட பாராளு மன்ற தேர்தல் நேற்று ஆரம்பமானது. இரண்டு நாட்கள் நடைபெறவுள்ள இரண்டாம் கட்டத் தேர்தலில் 9 மாகாணங்களுக்கான வாக்கெடுப்புகள் நடைபெறுகின்றன. இதில் வாக்களிப்பதற்காக வாக்குச் சாவடிகளில் பலரும் காத்திருந்ததை காணக் கூடியதாக இருந்ததாக அல் ஜkரா செய்தி வெளியிட்டுள்ளது. எகிப்தின் தெற்கு நகரங்களான சொஹாக், அஸ்வான் மற்றும் தலைநகர் கெய்ரோவுக்கு தெற்காக அமைந்துள்ள பனி செய்ப் போன்ற பகுதிகளில் நேற்று வாக்கெடுப்புகள் இடம்பெற்றன.

இரண்டாம் கட்ட வாக்கெடுப்பு இன்றைய தினம் முடிவடையவுள்ளது. இதில் 498 ஆசனங்களைக் கொண்ட கீழ்சபையில் 180 ஆசனங்களுக்கான வாக்கெடுப்பே நடைபெறுகின்றது.

ஏற்கனவே கடந்த வாரம் இடம்பெற்ற முதல்கட்ட வாக்கெடுப்பில் இஸ்லாமிய கட்சிகள் முன்னணியில் உள்ளன. இஸ்லாமிய சகோதரத்துவ அமைப்பின் அரசியல் பிரிவு அதிகப்படியான வாக்குகளைப் பெற்றதோடு கடும்போக்கு இஸ்லாமியக் கட்சியான அந்நூர் இரண்டாவது இடத்தைப் பிடித்தது.

எகிப்து பாராளுமன்றத்தின் கீழ் சபைக்கான மூன்றாவது மற்றும் கடைசிக் கட்ட தேர்தல் அடுத்த மாதம் நடைபெறவுள்ளது. இதனைத் தொடர்ந்து அதிகாரம் மிக்க மேல் சபைக்கான தேர்தல் ஆரம்பமாகும்.