பணமும் புகழும் கிடைப்பதால் கிரிக்கெட்டில் அரசியல் தலையீடு அதிகம் உள்ளது: சடகோபன் ரமேஷ் பேட்டி

கோவை, மே 8-

கோவை பார்க் குளோபல் பள்ளியில் கோடை கால கிரிக்கெட் பயிற்சி முகாம் நடைபெற்று வருகிறது. அதனை முன்னாள் கிரிக்கெட் வீரர் சடகோபன் ரமேஷ் பார்வையிட்டார்.

பின்னர் அவர் நிருபர்களிடம் கூறியதாவது:-

இந்தியாவில் மற்ற விளையாட்டுகளை விட கிரிக்கெட் மிகவும் புகழ்பெற்றதாக மாறியுள்ளது. பெரும் பணமும் புகழும் கிரிக்கெட்டில் கிடைக்கிறது. இதனால் இளைஞர்கள் கிரிக்கெட் விளையாட்டில் ஆர்வமாக ஈடுபடுகின்றனர்.

நாட்டுக்காக விளையாடுவதை விட ஐ.பி.எல். போட்டிகளில் 40 நாட்கள் விளையாடுவதால் அதிக பணமும் புகழும், வீரர்களின் திறமையை வெளிப்படுத்த வாய்ப்பும் கிடைக்கிறது.

இலங்கை வீரர்களை தமிழ்நாட்டில் விளையாட அனுமதிப்பது இல்லை என்ற அரசின் முடிவை பெரும்பாலான மக்கள் விரும்புகின்றனர். விளையாட்டு என்பது எல்லை தாண்டியது என்றாலும் அரசின் முடிவும் வரவேற்கத்தக்கது.

டி-20 கிரிக்கெட் போட்டி வந்த பின் ஒரு நாள் போட்டிகளுக்கு மவுசு குறைந்துள்ளது. முதல் 15 ஓவர்களிலும், கடைசி 15 ஓவர்களிலும் மட்டும் ரன் குவிப்பு ஒரு நாள் போட்டிகளில் இருக்கும். ஆனால் டி-20 போட்டிகளில் அனைத்து ஓவர்களிலும் ரன் குவிப்பு இருக்கும். இதனால் ரசிகர்கள் இந்த போட்டிகளை பெரிதும் விரும்புகின்றனர்.

இந்தியாவை பொருத்த வரை 1983-ல் உலக கோப்பையை கபில் தேவ் வென்ற பிறகு அவருக்கு புகழ் அதிகரித்தது. அதே போல 1990-க்கு பிறகு சச்சின் தெண்டுல்கருக்கு புகழ் கூடியது. இந்திய அணியை பொருத்த வரையில் டோனி தலைமையிலான ஒரு நாள் கிரிக்கெட் அணி நன்றாக உள்ளது. வேகப் பந்து வீச்சாளர்கள் நல்ல பலத்துடன் இல்லை. பந்து வீச்சாளர்களும் பேட்டிங்கில் சிறப்பாக விளையாட முயற்சிக்கின்றனர். பந்து வீச்சில் மட்டும் இப்போது யாரும் சிறப்பாக ஈடுபட விரும்புவதில்லை.

பணமும் புகழும் இருப்பதால் கிரிக்கெட்டில் அரசியல் தலையீடு அதிகம் உள்ளது. இந்தியாவை பொறுத்த வரையில் கிரிக்கெட் அணி தேர்வில் அரசியல் தலையீடு மிக குறைவு. தற்போதைய சூழ்நிலையில் பேட்ஸ்மேன்கள்தான் சூப்பர் ஸ்டாராக முடியும். பேட்ஸ் மேன்களைத்தான் மக்களும் விரும்புகின்றனர்.

மேற்கண்டவாறு சடகோபன் ரமேஷ் கூறினார்.