வவுனியாவில் அரிசி, கோதுமை மாவுக்கு தட்டுப்பாடு

இலங்கையின் வடக்கே வவுனியா மாவட்டத்தில் மழை வெள்ளத்தினால் இடம்பெயர்ந்துள்ள மக்களுக்கான நிவாரணமாக உணவுப் பொருட்களை வழங்குவதில் சிரமங்கள் ஏற்பட்டுள்ளதாகத் தெரிவிக்கப்படுகின்றது. இங்கு அரிசி, கோதுமை மாவு போன்றவற்றுக்குத் தட்டுப்பாடு நிலவுவதே இதற்கான காரணம் என கூறப்படுகின்றது.

தொடர்ச்சியான மழையின் காரணமாக அரிசி ஆலைகள் நெல்லை அவித்து காயவிடுவதில் பெரும் சிக்கல்களை எதிர்நோக்கியிருப்பதும், தற்போது ஆலைகளில் போதிய நெல் கையிருப்பில் இல்லாமல் இருப்பதும் அரிசி தட்டுப்பாட்டிற்கான முக்கிய காரணம் என அரிசி ஆலை உரிமையாளர்கள் கூறுகின்றார்கள்.

இந்தத் தட்டுப்பாட்டைப் போக்குவதற்கு நடவடிக்கை எடுக்கப்பட வேண்டும் என தான் அவசர கோரிக்கை விடுத்துள்ளதாக தமிழ் தேசியக் கூட்டமைப்பின் நாடாளுமன்ற உறுப்பினர் சிவசக்தி ஆனந்தன் தமிழோசையிடம் தெரிவித்தார்.

வவுனியா மாவட்டத்தில் அரிசிக்கு ஏற்பட்டுள்ள தட்டுப்பாட்டையடுத்து அரிசியின் விலையை அதிகரிக்க விடாமல் தடுப்பதற்கும் வர்த்தகர்கள் அரிசியைப் பதுக்கி வைக்காமல் இருப்பதற்கும், அரிசிக்கு விலைக்கட்டுப்பாடு விதிக்கப்பட்டிருக்கின்றது.

அத்துடன், வவுனியா மாவட்டத்திலிருந்து அரிசியை வெளிமாவட்டங்களுக்கு எடுத்துச் செல்வதையும் வவுனியா மாவட்ட அரசாங்க அதிபர் தடை செய்திருக்கின்றார் என்பது குறிப்பிடத்தக்கது.

அரிசியைக் கொழும்பில் இருந்து பெற்றுக் கொள்வதற்கான நடவடிக்கைகள் அரசாங்க அதிபரினால் எடுக்கப்பட்டுள்ள போதிலும், அவற்றைக் கொண்டு வருவதற்கான ட்ரக் வண்டிகள் இல்லாமல் இருப்பது பிரச்சினையாகியுள்ளது என வெள்ளத்தினால் பாதிக்கப்பட்டவர்களுக்கு நிவாரணமாக வழங்கப்படுகின்ற உணவு விநியோக நிலைமை குறித்து தகவல் வெளியிட்ட வவுனியா மாவட்ட கூட்டுறவு அபிவிருத்தி உதவி ஆணையாளர் குமாரசிங்கம் ரவீந்திரநாத் தெரிவித்தார்.

பலநோக்குக் கூட்டுறவுச் சங்கங்களின் வாகனங்கள் உள்ளுரில் பல இடங்களிலும் இடம்பெயர்ந்துள்ள மக்களுக்கு உணவு விநியோகத்தில் முழுமையாக ஈடுபட்டிருப்பதனால் அவற்றைக் கொழும்புக்கு அனுப்பி அரிசியைக் கொண்டு வர முடியாதிருப்பதாகவும் அவர் கூறினார்.

எனினும் இரண்டொரு தினங்களில் நிலைமை வழமைக்குத் திரும்பிவிடும் என்றும் அவர் நம்பிக்கை வெளியிட்டுள்ளார்.