பச்சை வாசனை

by **rammalar** Thu 19 Jun 2014 - 6:38

-
வெட்டுப்பட்ட வேம்பின்
அடிமரத்தை
ஒரு சொல்லும் சொல்லாமல்
மொளனமாய்ப் பார்த்தபடி
பறக்கிறது
நேற்றுவரை கிளையமர்ந்த
குயில்.
-
என் ஊர் வரை
படுத்திருக்கும் சாலைக்குள்
மடிந்து கிடக்கிறது
நான் பால்யத்தில் பார்த்து
நேசித்த ஒரு மலை.
-
கடைகளின் முன்சார்பில்
பிளாஸ்டிக் புட்டிகளுள்
அசையமல் மௌனமாய்
மரித்தபின்னும்
தூக்கில் தொங்குகின்றன
முன்னாள் ஆறுகளும், கிணறுகளும்.
-
சக்தி வாய்ந்த சாலைமுனி
வடக்கெல்லைப் பிடாரி
கூரையற்ற குப்பமுத்து
அனைவருக்கும்
மாற்று தெய்வங்கள் வந்துவிட்டதை
யார் சொல்வது?
-
மிச்சமிருக்கும் சிறுவனத்தின்
பெருமூச்சு
நிறமற்ற தீயாக மேலெழுந்து மறிக்க
சுற்றிக் கடந்து செல்கின்றன
மேகங்களெல்லாம்.
-
இனி எப்போதாவது உதிர்ந்தாலும்
அந்தத் துளி
தாகத்துக்கு நீரின்றிச் செத்தவனின்
கடைசி கண்ணீர்த்துளியாக
மட்டுமன்றோ இருக்கும்.
-
———————–
- நந்தன் ஸ்ரீதரன்
நன்றி: கல்கி