நெடுந்தீவில் பாம்புக் கடிக்கு இலக்கானவருக்கு நேர்ந்த கதி

by **veel** Wed 25 May 2011 - 23:50

நெடுந்தீவில் பாம்புக் கடிக்கு இலக்கானவருக்கு நேர்ந்த கதி

பாம்புக் கடிக்கு இலக்கான ஒருவரை உரிய முறையில் பராமரிக்காது நெடுந்தீவு மருத்துவமனை அசண்டயீனமாக நடந்து கொண்டமையால் அந்நபர் உயிரிழக்க நேர்ந்துள்ளது.

யாழ் நெடுந்தீவு சவரியார் கோவிலடியைச் சேர்ந்த வேலுப்பிள்ளை கதிரவேலு என்ற 68 வயது நபர் நேற்று முன்தினம் அவரது வீட்டில் பாம்பு கடிக்கு இலக்காகியுள்ளார்.உடனடியாக குடும்பத்தினர் அவரை நெடுந்தீவு மருத்துவமனைக்கு அவசரமாக அழைத்துச் சென்று சேர்த்துள்ளனர்.

நெடுந்தீவு மருத்துவ மனையில் அவரைப் பரிசோதித்து யாழ்.போதனா மருத்துவமனைக்கு மேலதிக சிகிச்சைக்காக சேர்க்கப்பட வேண்டும் என்று கூறப்பட்டது. ஆயினும் ஒருவரை அவசர ஊர்தியில் யாழ் கொண்டு செல்ல முடியாது, நோயாளர்கள் சேர்ந்த பின்னர் கொண்டு செல்வதாக மருத்துவமனை நிர்வாகம் தெரிவித்துள்ளது. தொடர்ந்து ஐந்து மணி நேரங்களின் பின்னரே யாழ்ப்பாணம் கொண்டு செல்லப்பட்டது.

யாழ். போதனா மருத்துவமனையில் சேர்க்கப்பட்ட அவர் சிகிச்சை பலனின்றி உயிரிழந்தார். நேரத்துடன் அவர் அனுமதிக்கப்பட்டிருந்தால் உயிரைக் காப்பாற்றிருக்கலாம் என மருத்துவமனை வட்டாரம் தெரிவித்துள்ளதாக இறந்தவரின் உறவினர் ஒருவர் தெரிவித்துள்ளார்.

இதே போன்று யாழில் பல மருத்துவமனைகள் இயங்குகின்றன. நோயாளர்களின் நலனை நோக்காது மருத்துவமனைப் பணியாளர்களின் வசதிகளை மட்டுமே எண்ணுகின்றனர். இந் நிலை மாறி நோயாளர்களின் நலம் பெற உரிய துறையினர் நடவடிக்கை எடுக்க வேண்டும் எனவும் இவரது உயிரே அதற்காக போகும் கடைசி உயிராக அமைய வேண்டுமெனவும் இறந்தவரின் உறவினர்கள் தெரிவித்தனர்.