யுனொப்ஸ் அனுசரணையில் கிரிக்கெட் போட்டி

அம்பாறை மாவட்டத்திலுள்ள விளையாட்டுக் கழகங்கள், அரச திணைக்களங்கள், கூட்டுத்தாபனங்கள், அரச, அரசசார்பற்ற நிறுவனங்களுக்கிடையே யுனொப்ஸ் நிறுவனம் “சூழல் மீள்நிர்மாணத்திட்ட சவால் கிண்ணத்திற்காக” நடாத்திவரும் மட்டுப்படுத்தப்பட்ட 10 ஓவர் கிரிக்கெட் சுற்றுப் போட்டியின் ஓர் அங்கமாக சென்ற வார இறுதியில் நடைபெற்ற போட்டிகளில் 1 ஆம் பிரிவில் ஆலையடிவேம்பு இராமகிருஷ்ண மிஷன் மகாவித்தியாலயமும், இரண்டாம் பிரிவில் தம்பிலுவில் கிராம முன்னேற்றச் சங்கமும் தெரிவாகியுள்ளன.

அக்கரைப்பற்று பட்டியடிப்பிட்டி அதாஉல்லா அரங்கத்தில் நடைபெற்ற 1 ஆம் பிரிவின் இராமகிருஷ்ண மிஷன் மகா வித்தியாலய கோஷ்டியுடன் அட்டாளைச்சேனை பிரதேச சபை கோஷ்டி மோதிக் கொண்டது. ஈற்றில் இராமகிருஷ்ண மிஷன் மகாவித்தியாலய கோஷ்டியினர் 4 விக்கெற்றுக்களால் வெற்றியீட்டினர்.

இரண்டாம் பிரிவில் தம்பிலுவில் கிராம முன்னேற்றச் சங்கக் கோஷ்டியினர் யுனொப்ஸ் ஏ+ கோஷ்டியுடன் மோதி 10 விக்கெட்டுக்களால் வெற்றியீட்டி இப் பிரிவில் தெரிவானது.

இந்தப் போட்டியின் போது யுனொப்ஸ் நிறுவனத்தின் அம்பாறை பிராந்திய சிரேஷ்ட நிகழ்ச்சித்திட்ட முகாமையாளர் பீற்றர் சிமித், திட்ட முகாமையாளர் செல்வி சீலியா மார்க்கஸ் ஆகியோர் பிரதம பார்வையாளர்களாகக் கலந்து கொண்டனர். இச் சுற்றுப் போட்டிக்கான எல்லா ஒழுங்குகளையும் யிஎன்எப்ஸ் ஸின் தொடர்பாடல் கண்காணிப்பு உத்தியோகஸ்தரும் சுற்றுப் போட்டியின் இணைப்பாளருமான ஆர். சுதாகரன் கவனித்தார்.