அமெரிக்கர்களை அசத்திய உப்புமா

உப்புமா என்றாலே பலரும் முகம் சுழிப்பர். ஆனால், அதற்கு ரூ.45 லட்சம் பரிசு கிடைத்துள்ளது என்றால் வியப்பான விஷயம் தானே?


அமெரிக்காவில் நகரில் நடந்த சர்வதேச போட்டியில் மும்பையை சேர்ந்த சமையல் கலைஞர் இந்த சாதனையை படைத்துள்ளார். லாஸ் ஏஞ்சலஸ் நகரில், டாப் ஷெப் மாஸ்டர்கள் போட்டி நடந்தது. இதில், பல கட்டங்களாக நடந்த போட்டியில் நூற்றுக்கணக்கான பேர் பங்கேற்று, பைனலில் மூன்று பேர் மட்டும் இருந்தனர்.

நியூயார்க்கில் ‘தப்லா’ ரெஸ்டாரென்ட் உரிமையாளர், மும்பையை சேர்ந்த ப்ளாய்டு கார்டஸ், லாஸ் ஏஞ்சலசில் பார்டர் கிரில் ஓட்டல் நடத்தும் பெண் சமையல் கலைஞர் மேரி சூ மில்லிகன், சான்பிரான்சிஸ்கோவில் ஜார்டினியர் ஓட்டல் நடத்தும் ட்ரேசி டெஸ் ஜார்டின்ஸ் ஆகியோருக்கு கடைசியில் வித்தியாசமான போட்டி நடத்தப்பட்டது. தங்கள் வாழ்நாளில் மறக்க முடியாத ஒரு டிபனை அவர்கள் தயாரிக்க வேண்டும்; அதை வைத்து தான் அவர்களுக்கு பரிசு தரப்படும் என்று அமைப்பாளர்கள் அறிவித்தனர்.

இதில் மில்லிகன், மலேசிய ஸ்பெஷலான தேங்காய்ப்பால் சேர்த்த மாமிச உணவும், ஜார்டின்ஸ் அதுபோலவே மீன் உணவும் செய்திருந்தனர். இந்திய ஷெப் கார்டஸ் செய்த அயிட்டம் உப்புமா. மூன்றையும் ருசித்த நடுவர்கள், மில்லிகன், கார்டஸ் செய்த அயிட்டத்தை மீண்டும் ருசித்தனர். கடைசியில், கார்டஸ் செய்த உப்புமா முதல் பரிசை வென்றதாக கூறி, , கார்டஸ் தான் ‘டாப் ஷெப்’ என்று அறிவித்தனர். பரிசுத்தொகை 45 லட்சம் ரூபாயை கார்டசிடம் அவர்கள் அளித்து, கிரீடத்தையும் அணிவித்தனர்.

கை கொடுத்த கொத்துமல்லி

கார்டஸ் செய்த ரவா உப்புமா, நடுவர்களை பெரிதும் கவர காரணம் அதன் மேல் தூவப்பட்ட கொத்துமல்லி தான். அதன் மணம் தான் பலரையும் வியக்க வைத்தது.
நடுவர்களில் ஒருவரான ‘வால் ஸ்ட்ரீட் ஜர்னல்’ சமையல் விமர்சகர் சார்லஸ் பாசி,‘ இது போன்ற ப்ளேவருடன் ஒரு டிபனை நான் ருசித்ததே இல்லை’ என்றார். சேவியர் சமையல் இதழ் ஆசிரியர் ஜேம்ஸ் ஆஸ்லண்ட் இன்னொரு நடுவர். ‘உண்மையில் மறக்க முடியாத அயிட்டம்’ என்றார். ‘தப்லா ஓட்டலில் இந்தியர்களுக்கு மிகவும் பிடித்த டிபனே உப்புமா தான்; அதை செய்து செய்து சலித்து விட்டது; ஆனால், இங்கு பரிசை பெற்றுத்தந்ததே அது தான்’ என்று கார்டஸ் வியப்பு மேலிட கூறினார்.

பயோகெமிஸ்ட் ஷெப் ஆன கதை

மும்பையில் பிறந்து வளர்ந்த கார்டஸ், பயோ கெமிஸ்ட்ரி தான் படித்தார். ஆனால், அது பிடிக்காமல், கேட்டரிங்கில் நுழைந்தது எதிர்பாராதது. நன்றாக சாப்பிடுவார்; ருசிப்பார். அதன் விளைவு கேட்டரிங் படிப்பில் சாதித்தார். சுவிட்சர்லாந்து போய் மேல்படிப்பு படித்தார். திரும்பி வந்த ஓபராய் ஓட்டலில் ஷெப் ஆனார். 2005ல், அமெரிக்காவில் பிரான்ஸ் நண்பருடன் சேர்ந்து, தப்லா என்ற பெயரில் இந்திய, பிரெஞ்சு ஓட்டலை ஆரம்பித்தார். இந்தியர்கள் பலரும் நான் வெஜ் அயிட்டங்களுக்கு தாவி விட்டதால், தப்லாவை கடந்தாண்டு மூடி விட்டார். விரைவில் மீன் உணவு ஓட்டலை ஆரம்பிக்க உள்ளார்.

ரவை உப்புமா

தேவையானவை :
ரவை - 1 சிறிய டம்ளர் (1 ஆளுக்கு)
பெரிய வெங்காயம் - 1ல் பாதி
மிளகாய் - 2
கடுகு, கறிவேப்பிலை, உப்பு - கொஞ்சம்

செய்முறை :
1. ரவையை வாணலியில் போட்டு கொஞ்சம் பொன்னிறமாக வரும்படி நன்றாக வறுத்துக் கொள்ளவும்.

2. வெங்காயம், மிளகாயை நறுக்கிக் கொள்ளவும்.

3. வாணலியில் எண்ணெய் ஊற்றி கடுகு, வெங்காயம், மிளகாய், கறிவேப்பிலை சேர்த்து நன்றாக வதக்கிக் கொள்ளவும்.

4. வதக்கிய வெங்காயத்துடன் 2 டம்ளர் தண்ணீர் சேர்த்து லேசாகக் கொதிக்க விடவும். அப்படியே உப்பையும் சேர்த்துக் கொள்ளவும்.

5. பின் வறுத்த ரவையை அதில் சேர்த்து விடாமல் கிண்டவும்.

5 நிமிடம் கழித்துப் பார்த்தால் சுவையான உப்புமா தயார்.

அசத்தலான மேட்டருய்யா வாழ்த்துக்கள்