வெஸ்ட் இண்டீசுக்கு எதிரான முதல் டெஸ்ட்: இந்தியா அபார வெற்றி

கிங்ஸ்டனில் நடந்த முதல் டெஸ்ட் போட்டியில் இந்திய அணி 63 ரன்கள் வித்தியாசத்தில் அசத்தல் வெற்றி பெற்றது.
துடுப்பாட்டத்தில் ஜொலிக்கத் தவறிய வெஸ்ட் இண்டீஸ் அணி, சொந்த மண்ணில் பரிதாபமாக தோல்வியடைந்தது. வெஸ்ட் இண்டீஸ் சென்றுள்ள இந்திய அணி மூன்று போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்ட் கிங்ஸ்டன் (ஜமைக்கா) நகரில் உள்ள சபினா பார்க் மைதானத்தில் நடந்தது. இதன் முதல் இன்னிங்சில் இந்திய அணி ரெய்னா (82), ஹர்பஜன் சிங் (70) உதவியுடன் 246 ரன்கள் எடுத்தது. வெஸ்ட் இண்டீஸ் அணி 173 ரன்னுக்கு சுருண்டது.

நேற்று முன்தினம் மூன்றாம் நாள் ஆட்டம் நடந்தது. விராத் கோலி (15), ரெய்னா (27) இருவரும் நடுவர்கள் ஹார்பர், இயான் கோல்டின் தவறான தீர்ப்பில் வெளியேறினார். கப்டன் டோனி 16 ரன்களுடன் திரும்பினார். ஹர்பஜன் (5), பிரவீண் குமார் ரன் எடுக்காமலும் அவுட்டாகினர். ஒருமுனையில் விக்கெட் சரிந்த போதும், மறுபக்கம் அபார ஆட்டத்தை வெளிப்படுத்திய டிராவிட், சர்வதேச அளவில் 32 வது சதம் கடந்து அசத்தினார். இவருக்கு நல்ல ஒத்துழைப்பு கொடுத்த அமித் மிஸ்ரா 28 ரன்கள் எடுத்தார். அடுத்த சில நிமிடங்களில் டிராவிட்டும் (112) அவுட்டாக, இந்திய அணி இரண்டாவது இன்னிங்சில், 252 ரன்னுக்கு ஆல் அவுட்டானது.

வெஸ்ட் இண்டீஸ் சார்பில் சமி, தேவேந்திர பிஷூ தலா 4 விக்கெட் வீழ்த்தினர். இரண்டாவது இன்னிங்சில் 326 ரன்கள் எடுத்தால் வெற்றி என்ற நிலையில், வெஸ்ட் இண்டீஸ் அணி களமிறங்கியது. ஆட்ரியன் பரத், சிம்மன்ஸ் இணைந்து அதிரடியான துவக்கத்தை கொடுத்தனர். இஷாந்த் சர்மாவின் ஓவரில் இரண்டு சிக்சர், ஒரு பவுண்டரி அடித்து அசத்தினார் பரத். மறுமுனையில் சிம்மன்ஸ், தன்பங்கிற்கு அமித் மிஸ்ரா பந்தை சிக்சருக்கு விரட்டினார். முதல் விக்கெட்டுக்கு 62 ரன்கள் சேர்த்த நிலையில், பரத் (36 பந்தில் 38 ரன்கள்) பிரவீண் குமார் வேகத்தில் வீழ்ந்தார். அடுத்து வந்த சர்வான் ரன் எடுக்காமல் அவுட்டானார். சிம்மன்ஸ் (27), இஷாந்த் பந்தில் போல்டானார். இதன் பின் சந்தர்பால், டேரன் பிராவோ இணைந்து மேலும் விக்கெட் எதுவும் விழாமல் பார்த்துக் கொண்டனர்.

நேற்று நான்காம் நாள் ஆட்டம் நடந்தது. நீண்ட நேரம் தாக்குப்பிடித்த டேரன் பிராவோ (41) இஷாந்த் பந்தில் போல்டானார். அடுத்த சில நிமிடங்களில் சந்தர்பாலும் (30) நிலைக்கவில்லை. பாக் ரன் எடுக்காமல் அவுட்டானார். ஹர்பஜன் ஓவரில் "ஹாட்ரிக்” சிக்சர் விளாசிய கப்டன் சமி (25), பிரண்டன் நாஷ் (8) இருவரும் அமித் மிஸ்ரா சுழலில் சிக்கினர்.

அதிரடியாக ரன்கள் சேர்த்த ராம்பால் (34), டோனியின் கேட்ச்சில் வெளியேறினார். அடுத்து வந்த பிஷூ (26) போராடி வீழ்ந்தார். வெஸ்ட் இண்டீஸ் அணி இரண்டாவது இன்னிங்சில், 262 ரன்னுக்கு ஆல் அவுட்டாகி, 63 ரன்கள் வித்தியாசத்தில் தோல்வியடைந்தது. இந்தியா சார்பில் இஷாந்த் சர்மா, பிரவீண் குமார் தலா 3, அமித் மிஸ்ரா 2 விக்கெட்டுகள் வீழ்த்தினர். இதையடுத்து மூன்று போட்டிகள் கொண்ட டெஸ்ட் தொடரில் இந்திய அணி 1-0 என முன்னிலை பெற்றது. இரு அணிகள் இடையிலான இரண்டாவது டெஸ்ட் வரும் 28 ம் திகதி பிரிஜ்டவுனில் துவங்குகிறது.