சிறுநீரகத்தை சூடாக்குவதன் மூலம் இருதய நோயை குணப் படுத்தலாம்.’

by **ஷஹி** Fri 24 Jun 2011 - 19:02

இதை படித்த உடன் இது என்ன வைத்திய முறை என்று அதிர்ச்சி அடையாதீர்கள். இந்த மருத்துவ முறை குறித்து ஆய்வு நடத்தி இருக்கிறார்கள் இங்கிலாந்து விஞ்ஞானிகள்.

லண்டன் இம்பீரியல் மருத்துவக்கல்லூரியில் இருதயவியல் துறையில் மருத்துவ நிபுணராக இருப்பவர் டேர்ரல் பிரான்சிஸ். இவரும் இவரது ஆய்வுக்குழுவினரும் இருதய நோய் மற்றும் அதற்கான காரணங்கள், சிகிச்சை முறைகள் குறித்து ஆய்வுகள் நடத்தி வருகிறார்கள். இவர்கள் ஆய்வில் வித்தியாசமான ஒரு தகவல் கிடைத்தது.

அதாவது, இருதய நோய் வர சிறுநீரகமும் ஒரு காரணம்.

ரத்தத்தை சுத்திகரிப்பது உள்பட பல்வேறு பணிகளை செய்யும் சிறுநீரகம், தனது பணிகளுக்கு ஏற்ப மூளைக்கு (நரம்பு மண்டலங்கள் மூலம்) சில தகவல்களை அனுப்புகிறது.

உதாரணமாக ஒருவரது ரத்தத்தில் சர்க்கரை அளவு அதிகமானால், (சுத்திகரிப்பு பணியின் போது சிறுநீரகம் அதை அறிந்து கொண்டு) உடனே மூளைக்கு அதுபற்றி செய்தி அனுப்புகிறது. இதற்கு ஏற்ப மூளையும் அதை சரிசெய்ய பயன்படும் புரதங்களை சுரக்கச்செய்ய மற்ற உடல் உறுப்புகளுக்கு கட்டளை பிறப்பிக்கும்.

இதுபோல பல்வேறு தகவல்களை சிறுநீரகம் அனுப்பும் போது இருதயம் பற்றிய அபாய எச்சரிக்கை தகவல்களை `தவறாக’ அனுப்பி விடுகிறதாம்.

இதனால் மூளையும் அதை சரிசெய்ய தவறான உத்தரவுகளை பிறப்பித்து விடுகிறது. இந்த குளறுபடி காரணமாகவே இருதயக்கோளாறுகள், உயர் ரத்த அழுத்தம், மூச்சுத்திணறல் போன்ற பிரச்சினைகள் சிலநேரங்களில் ஏற்படுகிறது என்று விஞ்ஞானிகள் கண்டுபிடித்துள்ளார்கள்.

இதை சரிசெய்ய என்ன செய்யலாம் என்றும் ஆய்வு நடத்தப்பட்டது. அப்போது சிறுநீரகத்தில் வெப்ப அளவை அதிகப்படுத்துவதன் மூலம் சிறுநீரகத்தில் ஏற்படும் குளறுபடிகளை சரிசெய்ய முடியும் என்று தெரியவந்தது.

இதன்படி சிறுநீரகம் அருகே உள்ள ரத்தக்குழாயில் ஒரு `கத்தீட்டர்’ அனுப்பி அதன் மூலம் மின் அதிர்வுகளையும், வெப்ப அலைகளையும் உருவாக்கினார்கள். இதன் மூலம் சிறுநீரகம் இருக்கும் பகுதியில் வெப்பம் அதிகரித்து அதில் உள்ள கோளாறுகளை சரிசெய்தனர்.

வித்தியாசமான இந்த மருத்துவ முறை தற்போது ஆய்வு நிலையில் உள்ளது. இந்த ஆய்வுகள் நிறைவு பெறும் போது இருதய கோளாறுகளுக்கு வித்தியாசமான `அதிர்ச்சி வைத்தியம்’ கிடைக்கலாம்.

Categories: அறிவியல் செய்திகள்