லோக்பால் வரம்புக்குள் பிரதமரை சேர்ப்பதில் மன்மோகன் சிங்கிடம் ஆட்சேபம் கிடையாது

by **நண்பன்** Fri 1 Jul 2011 - 12:24

லோக்பால் வரம்புக்குள் பிரதமரை சேர்ப்பதில் மன்மோகன் சிங்கிடம் ஆட்சேபம் கிடையாது
‘ஊழல் விவகாரம் இன்று விஸ்வரூபம் எடுத்துள்ளது’ என்கிறார்
புதுடில்லி;
லோக்பால் வரம்புக்குள் தம்மை சேர்ப்பதில் எவ்வித தயக்கமும் இல்லை என்று பிரதமர் மன்மோகன் சிங் குறிப்பிட்டார். இருப்பினும் உயர் நிலை நீதித்துறையை இதற்குள் கொண்டு வர வேண்டாம் என்றும் அவர் தெரிவித்தார். டில்லியில் புதன்கிழமை 5 பத்திரிகை ஆசிரியர்களுக்கு தனது இல்லத்தில் அளித்த பேட்டியில் அவர் மேலும் கூறியது; லோக்பால் வரம்புக்குள் நீதித்துறையை கொண்டுவந்தால் அது முரண்பாடாக இருக்கும் என்று அவர் குறிப்பிட்டார்.

லோக்பால் மசோதாவை நிறை வேற்றுவதில் தேசிய அளவில் ஒருமித்த கருத்து எட்டப்படும் என்றும் நம்பிக்கை தெரிவித்தார். லோக்பால் வரம்புக்குள் பிரதமரைக் கொண்டு வந்தால் அது ஸ்திரமற்ற நிலையயை ஏற்படுத்தும் என்றும் சில சமயம் அது கைமீறி போகக் கூடும் என்றும் தமது அமைச்சரவை சகாக்கள் கருதுவதாகக் குறிப்பிட்ட பிரதமர் இந்த விடயத்தில் தம்மை சேர்ப்பதில் தமக்கு எவ்வித தயக்கமும் இல்லை என்றார்.

தம்மை சேர்ப்பதிலோ அல்லது பிரதமர் அலுவலகத்தை லோக்பால் வரம்புக்குள் கொண்டு வருவதிலோ எவ்வித ஆட்சேபனையும் கிடையாது. பிரதமர் பதவிக்கு வரும் எவருமே மக்களுக்காக 24 மணி நேரமும் பணியாற்ற கடமைப்பட்டவர்கள்.

நாடாளுமன்னறத்தில் நம்பிக்கை வாக்கெடுப்பின் மூலம் எந்த நேரமும் பிரதமரை பதவி நீக்கம் செய்து விட முடியும். நாட்டில் ஒரு விடயத்துக்கு பலவிதமான கருத்துகள் வெளி வருகின்றன. இருப்பினும் அரசியல் கட்சிகளின் வழிகாட்டுதலோடு அது நிறை வேற்றப்பட வேண்டும் என்பதையே தான் விரும்புவதாக அவர் குறிப்பிட்டார்.

பிரதமரை லோக்பால் வரம்புக்குள் கொண்டு வர வேண்டாம் என்று தமிழக முதல்வர் ஜெயலலிதாவும், பஞ்சாப் முதல்வர் பிரகாஷ்சிங் பாதலும் குறிப்பிட்டுள்ளதையும் பிரதமர் சுட்டிக் காட்டினார்.

உயர்நிலை நீதித்துறையை லோக்பால் வரம்புக்குள் கொண்டு வருவதில் தமக்கு உடன்பாடு இல்லை என்றும் குறிப்பிட்டார். அரசியல் சாசன அமைப்பின் படி நீதித்துறை சுதந்திரமாக அதற்குரிய வழிகாட்டுதலோடு செயல்படுவதை ஊக்விக்க வேண்டும். ஒருவேளை லோக்பால் வரம்புக்குள் நீதித்துறையைக் கொண்டு வந்தால் அது சிக்கலான பிரச்சினைக்கு எவ்விதம் தீர்வு காணும் என்றும் மன்மோகன் சிங் கேள்வியெழுப்பினார்.

ஊழல் விவகாரம் மக்கள் மத்தியில் மிகப் பெரிய பிரச்சினையாக உருவெடுத்துள்ளது என்பதை ஒப்புக் கொண்ட பிரதமர் இதைக் கட்டுப்படுத்த லோக்பால் சட்டம் அவசியம் என்றாலும் அது ஒன்றே தீர்வாக அமைந்துவிடாது என்றார். தனது அரசு லோக்பால் மசோதாவுக்கு தேசிய அளவில் ஒரு மித்த கருத்தை எட்டுவதில் தீவிரமாக செயல்படுவதாக அவர் குறிப்பிட்டார்.

மக்கள் பிரதிநிதிகள் மீது தமக்கு மிகுந்த மதிப்பு உள்ளதாகக் குறிப்பிடட பிரதமர் இருப்பினும் அவர்களுடன் பேச்சு வார்த்தையில் தான் பங்குகேற்பதில் சில பிரச்சினைகள் இருந்ததாகக் குறிப்பிட்டார். கடந்த மார்ச் மாதம் அண்ணா ஹசாரேயை தான் சந்தித்ததாகவும், அப்போது மழைக்கால கூட்டத் தொடரின்போது லோக்பால் மசோதா கொண்டு வரப்படும் என அவரிடம் உறுதி அளித்ததாகவும் பிரதமர் கூறினார்.

அண்ணா ஹசாரே அரசியல் ரீதியில் தூண்டப்படுகிறாரா என்று கேட்டதற்கு அரசு பேச்சு நடத்துகிறது என்பதற்காகவே அதன் செயல்பாடுகள் அனைத்துக்கும் காரணம் கேட்பது தவறான போக்காகும். சமூக அமைப்புகளைச் சேர்ந்த பிரதிநிதிகளுடன் இணைந்து செயல்பட அரசு எப்போதும் தயாராகவே உள்ளது. அதற்காக அவர்கள் சொல்லுவதுதான் சரி என்று ஒரு குழு கூறுவதை ஒருபோதும் ஏற்க முடியாது என்றார் பிரதமர்.