லோக்பால் மசோதாவில் பிரதமரை சேர்ப்பது குறித்து அடுத்த வாரம் முடிவு

by *சம்ஸ் Tue 29 Nov 2011 - 6:25

லோக்பால் மசோதாவில் பிரதமரை சேர்ப்பது குறித்து அடுத்த வாரம் முடிவு
பாராளுமன்ற குழு தலைவர் அபிஷேக் சிங்வி தகவல்
லோக்பால் மசோதாவில் பிரதமரை சேர்ப்பது குறித்து அடுத்த வாரம் முடிவு செய்யப்படும் என்று லோக்பால் மசோதா குறித்து ஆய்வு செய்து வரும் பாராளுமன்ற குழுவின் தலைவர் அபிஷேக் சிங்வி தெரிவித்தார்.

லஞ்சம் ஊழலை ஒழிக்க வலுவான லோக்பால் மசோதா கொண்டு வர வேண்டும் என்று காந்தியவாதியும், சமூக சேவகருமான அன்னா ஹசாரே தலைமையிலான குழு போராடி வருகிறது. பிரதமர், நீதிபதிகள், சி மற்றும் டி பிரிவு பணியாளர்கள் உள்ளிட்ட சிலரையும் சில அமைப்புகளையும் வலுவான லோக்பால் மசோதாவின் விசாரணை வரம்புக்குள் கொண்டுவர வேண்டும் என்றும் அவர்கள் வலியுறுத்தி வருகின்றார்கள்.

மத்திய அரசு கொண்டுவர இருக்கும் லோக்பால் மசோதா குறித்து ஆய்வு செய்ய காங்கிரஸ் எம்.பி. அபிஷேக் சிங்வி தலைமையில் எம்.பிக்களைக் கொண்ட ஒரு குழுவை மத்திய அரசு நியமித்து உள்ளது. வருகிற 7ம் திகதிக்குள் இந்த குழு தனது அறிக்கையை அளிக்க வேண்டும் என்று கால அவகாசம் கொடுக்கப்பட்டு உள்ளது.

இந்த நிலையில் லோக்பால் மசோதா விசாரணை வரம்புக்குள் பிரதமரை சேர்ப்பது குறித்து பாராளுமன்ற குழு தலைவர் அபிஷேக் சிங்வியிடம் கேட்கப்பட்டது. அதற்கு அவர் பதில் அளித்து கூறியதாவது:- பிரதமரை லோக்பால் மசோதா விசாரணை வரம்புக்குள் கொண்டு வருவதா? வேண்டாமா? என்பது குறித்து எங்கள் குழு அடுத்த வாரம் கூடி முடிவு செய்யும். தற்போது எங்களுக்கு கொடுத்த வேலை தொடர்பாக அறிக்கை தயாரிக்கும் பணி நடந்து வருகிறது. இந்தப் பணிகள் இந்த வாரத்துக்குள் முடிந்து விடும் என்று நம்புகிறேன்.

ஊடகங்கள், நிறுவனங்கள், தன்னார்வ அமைப்புக்கள், கீழ் நிலை பணியாளர்கள் மற்றும் மக்கள் பிரதிநிதிகள் உட்பட பல்வேறு தரப்பினர் லோக்பால் மசோதா குறித்து கவலை தெரிவித்துள்ள 25 பிரச்சினைகள் தொடர்பாக சீரான முறையில் ஆய்வு செய்து அறிக்கையில் சேர்க்கப்படும். இவ்வாறு அவர் தெரிவித்தார்.

“நீங்கள் தயாரிக்கும் அறிக்கை எல்லா தரப்பினரையும் திருப்திப்படுத்தும் வகையில் இருக்குமா?” என்று அவரிடம் கேட்டதற்கு “ஒவ்வொரு வரையும் திருப்திப்படுத்தவோ அல்லது யாராவது ஒருவரை திருப்திப்படுத்தவோ அறிக்கையை நாங்கள் தயாரிக்கவில்லை. எங்கள் மனச்சாட்சிக்கு விரோதம் இல்லாமல், எங்களுக்கு திருப்தி அளிக்கும் வகையில் இந்த நாட்டுக்கு நாட்டு நலனுக்கு திருப்தி அளிக்கும் வகையில் அந்த அறிக்கை இருக்கும்” என்று சிங்வி கூறினார்.